Jamita Minggu, 19 Pebruari 2017: Mateus 5 : 38 - 48

Mateus 5 : 38 - 48 "HAHOLONGI MA MUSUMI"

I. Patujolo

Mateus 5 : 1 7 : 29, somal do on didok Jamita di dolok, na papatarhon hasintongan ni Debata na disi halak Kristen ingkon mangolu ala haporseaonna maradophon Anak ni Debata (Galatia 2 : 20), jala ala hagoon ni Tondi Parbadia na mian dibagasan ngolu ni jolma i (Rom 8 : 2 – 14; Gal. 5 : 16 – 25). Sandok halak na gabe parjambar di harajaon ni Debata ingkon mauas male dihasintongan na niajarhon di jamita ni Kristus i.

II. Hatorangan – APLIKASI – SIBOANON TU JAMITA

Ay. 38: "Mata do abul ni mata; ipon do abul ni ipon!", on ma sada ajaran na ginoaran: LEX TALIONIS (2 Musa 21 : 24 – “Mata do abul ni mata, ipon do abul ni ipon, tangan do abul ni tangan, pat do abul ni pat”), on ma sada prinsip uhum (hukum) hombar tu na niulana. Alai ndang na gabe magalehon sada kebebasan tu sandok jolma laho mambalos hajahaton (balas dendam:3 Musa 19 : 18 – ndang jadi baloshononmu na jahat, jala ndang jadi marsunisunian roham tu anak ni bangsom, ingkon haholonganmu donganmu jolma songon dirim, ai Ahu do Jahowa). Dibahen pe uhum on, asa sasintongna holan asa manjagahon asa unang adong pamaloson na marlobi, asa unang adong na manguhumi sandiri (hakim sendiri), alai asa dipasahat tu angka na naung ditontuhon laho manguhum, ima angka panguhum i. Laos dison ma tarida pangajarion taringot tu uhum na sintong jala na denggan. Disada pihak, halak na mangulahon hajahaton gabe mabiar mangulahon hajahaton ala uhum i , di nasa na i halak na gabe korban ndang boi manambai uhum na patutut tu na taruhum. Alai godang di angka guru-guru di halak Jahudi, ingkon pamasahon on, jala ndang holan na parpunguan, marsasahalak pe boi do mambaloshon manang mangulahon ulaon on.  Ndang marlakku dinasida uhum pengadilan. Jadi, rap parsiajaran ma on di natolu pihak: Panguhum, na taruhum dohot korban, asa tarida uhum na adil jala setimpal, asa jaga on do halak na so marsala. Ay. 39: Songon dia do parenta ni Padan Naimbaru i sasintongna, ima: na menuntut i ingkon do pasesahon sala manang dosa ni na marsala i, jala ndang manggogo manambai uhum naung patutu jinalona. Ai nang on do parenta HALOMBOHON ni KRISTUS jala na neang do auga i. Hombar tu sude umbahen na dipatorang Jesus, asa: ndang boi adong di jolma i pamaloson (balas dendam. Ai molo adong pamaloson, tu dos do jolma i na jahat songon halak na mangulahon hajahaton i tu dirina. Sasintongna, ingkon lobi sian na niula na i ulahonon ni jolma i, ima: pasesahon sala na (pengampunan: Poda 20 : 22; 24 : 29; 25:21 – 22; Rom 12:7). Molo tung adong halak na mambahen hansit roha, mangido ganti rugi, dang hak ta i, alai hak ni na marHuaso i doi, ima Debata, jala tu Ibana do dipasahat rimas i. Manang, molo pe tung asa manjaga hasonangan i, adong do wakil ni Debata na boi manguhum i. Jotjot do tabege hata, IBANA do NA PARJOLO…(mangantuk, mangulahon na sala), alai ringkot ingotonta….ALA NA ADONG DO NA PADUAHON gabe adong parsoalan.  Adong tolu na khusus diajarhon Kristus i tu halak Kristen:

1. MAMASTAP HURUM, on ma pambahenan na mambahen Hancit jala gabe MARLEA, alai didok, tarehon hurum na sada nari, artina: ndang adong pamaloson alai ingkon rade muse na adong do PAMASTAPON i, jala ingkon jaloon do on huhut sabar. Unang ma dibaloshon parulaon na salaon, nang pe sipata gabe didok angka na humaliang do na so denggan i maradophon hita, jala boi diparengkeli alai na oto doi, alai halak na mangolu dibagasan pantas ni roha (bijaksana), pasangaponna do ho songon sahalak na tutu mangihuthon Kristus i.

2. AGOAN BAJUBAJU (ay. 40): on ma sada contoh na agoan di arta. Jotjot do masa na sisongon on, molo adong perkara, na tongtong rap tu angka panguhum. Na gabe lam paganda angka harugian.. Jadi ala na so adong pamaloson, dang ganda harugian. Manuhor sada bajubaju ommotik doi sian na ingkon mampartahanton hasintongan manang menuntut asa di uhum halak  na mambuat ulos i. Jadi, saluhut do di hokkom na denggan i. Ndang holan hasonangan ni roha, alai dohot do nang arta i pen dang lam moru.

3. MARDALAN SAPAAL/ 1 mil (ay. 41). Molo adong na manggogoi (memaksa) mangulahon haporluanna, manang laho manghobasi ulaonna, unang morongorong (mengeluh), alai rap ma mardalan dohot ibana jala pola sahat tu dua paal, ndang gabe marbada dohot nasida. Unang ma dok:”huulahon iala na dipaksa do; molo dang no oloan, gabe tubu bada”, alai dok ma:”Na sai ulahononku doi, asa unang tubu angka bada:” Tumagonan do ni ulahon i daripada gabe mangoloi ginjang ni roha dohot pamaloson

4. Ay. 42: Parbahulbahul nabalga (dermawan dan murah hati). Dang holan unang manghansiti roha ni dongan, alai gari ada ingkon  ulahononkon na denggan maradophon nasida (Psalm 112 : 5). Pandohan on ndang tu halak na losok.Tu halak na tau manjalo do on silehonon. Manang aha na nidok Debata tu hita ingkon ulahononta, hita ingkon dohonta doi maradophon dongan jolma:”Pangido, na nilehonon do di hamu.”

5. Mangurupi halak na marsali: Unang tulak ia halak na ro marsali, molo tutu adong do sipatupaon hombar tu na pinangido na i. Gari ingkon ajaranmu nang nasida pagodanghon pangomoanna marhite sian nasinalina i sian ho. Sila ni ima, tongtong ingkon mangarade do hita laho mangulahon na denggan, ala andorang so mangido hita tu Tuhan i, nunga ditangihon be hita jala manjanghon hita dohot pasupasu na gok. Jadi, pandohan MARTUA (berbahagialah), ingkon manghorhon doi maradophon dongan: a). Muruk tudos doi na mamunu; b). mangolu dibagasan hadameon c). Ias marroha; d). Dang adong pamaloson tu hajahaton ni dongan, tudos doi halak na lambok roha; e). Manghaholongi musu tudos do on siboan dame. Jadi dison ma parenta/tona ni Tuhan Jesus di na laho mangulahon patik-Na i, tudos songon Ama na denggan marroha (sempurna), dang sada ulaon na so tarpatupa hita i sasintongna, na boi do hita tong mangulahonsa. Ala ganup ngolu ni halak Kristen, adong do di ibana ngolu ni Kristus i na mangogoihon jolmai marpangalhohon pangalaho banuaginjang (berkarakter sorgawi; Mateus 5 : 3 – 10). Pangalaho na sisongoni margogoihon jolma i mangoloi jala manguoahon patik-Na i, jala gabe sada panghirimon (motivasi) na sintong jala denggan. Antong, tapataridahon jala taulahon ma panghatindangion on, marhite na mangoloi tona ni Tuhan i marhite panghirimon na denggan jala manghirim tu hasisingkop ni ngolu pardagingon nang partondion pe. Haholongi ma musum songon dirim.