Ev. Lukas 20 : 27 - 38
DEBATA NI ANGKA NA MANGOLU DO IBANA
Patujolo
Diganup partingkian na di portibion, sai
adong do sian jolma on, marhite sian angka pamingkirionna na rorang i, naeng
paubahon angka hasintongan naung nipodahon ni angka ugamo. Isarana sian horong
ni DEIS (na so manjanghon na dohot do Hagoon ni Debata marhuaso sian sandok na
masa tano on), na mandok dirina angka parhapistaran (pemikir) bebas, alai
sasintongna parhapistaran pargapgap do nasida. Suang songoni do nang Saduse di
partingkian ni Jesus, na so manjanghon pangajarion taringot tu haheheon ni
angka na mate nang hangoluan sogot (on ma ni dok na ANASTASIS), nang pe
taringot tu si nunga dipabotohon di Padan Narobi na jala na sasintongna on do
naung gabe bohal (dasar) ni haporseaon ni Jahudi. Ndang holan pamatang on naso
mulak mangolu muse, jala dang adong inganan ni tondi (tidak ada dunia roh), jala ndang adong jambar ni angka naung
mangula diportibi on. Molo songonon do sude pangantusion ni jolma, na masursur
nama ianggo parugamoon i.
Hatorangan – Aplikasi
Somalna : halak na marsangkap laho
papilithon taringot tu hasintongan na sian dohot taringot tu Debata, ingkon
mambahen dalan laho manggaori huhut dipadokdok angka persoalan holan asa gumale
angka haporseaon ni angka naung maniop hasintongan i. Marhite sian sungkun-sungkun on, na arop do
roha ni nasida tung so adong alus na tangkas jala mambahen saluhutjolma na
tumangihonsa gabe tangkas parbinotoanna. Mansai andul do haimbaron ni angka
Anak hasiangan on sian Anak ni Debata di banua ginjang, tung so adong do
tudosanna i. Anak hasiangan on mangoli jala pangolihonsa. Hajolmaon sisaonari
on, na burju manang na jahat, mangoli jala pangolihon anakna. Godangan sian
ulaonta diportibi on ima pagodanggodanghon jala manarihon ripetta ganup. Sian
angka si las ni roha na adong diportibi on, deba i sian angka sisolhot do,
parnijabu nang sian anak. Alai na salpu do saluhut, siala ni ido nasida mangoli
jala pngloihon anakna, asa digohi nasida tano on, jala gabe adong pinompar na
manean saluhut angka na niula nang sinarina, tarlumobi asa bangsi pinillit ni
Debata gabe adong, ai pomparan namar-Tuhan i do na dilului marhite pangolian i
(Maleakhi 2 : 15 - Jala
ndang anggo ibana na sasada i mambahen songon i, laos tading dope di ibana
pasipasi ni tondi. Alai aha do diulahon na sasada i? Na mangalului pinompar
sian Debata do ibana. Dibahen i jaga hamu ma tondimuna, unang tung ditoisi
manang ise jolma ni haposoonna). Pinompar na
manghobasi Tuhan i. Hasiangan sogottung mansai imbar do. Adong do lobi sian sada do
hasiangan., imahasiangan sisaonari na taridai dohot hasiangan na naeng ro na so
tarida i. Ringkot situtu do hita laho paimbarhon hasiangan on dohot hasiangan
na asing i, jala mangalehon roha, mangharingkothon tu nadua i hombar tu na dua
i na tau tu hita. Nuaeng taparrohahon ma: Ise do na gabe pangisi ni hasiangan
na asing i? Ima halak na niida tau taruli di parjambaran di hasiangan na asing
i, ima halak na mangharingkothon ulaon haluaon na pinatupa ni Kristus, na
tinuhor-Na i tu hita, na hasisingkopna dibahen Tondi Parbadia, na mangula
paradehon hita manjanghon ulaon ni Kristus i. Na mambahen hita tau disi ima ala
ulaon ni ParbaritaanNauli (injil), ima sada arga na so tartuhor naung digarar
Kristus dibagasan panobusion-Na. Sandok na sa ulaon na so gabeak na adong dipangalaho ni hajolmaon i,
dipasiding, jala saluhut na hombar tu angkahagiot ni roha i dipahombar Ibana tu
asi ni roha-Na. Ala asi ni rohana gabe dipatau hita jala boi maruli parjambaran
di hasiangan na asing i. Siala ni godang ni angka pangambati asa bongot hita
tusi, ingkon marlojong do hita maruli di hahehean sian angka na mate, ima
haheheon na gok pasupasu jala ndang maruli haluaon asa diuhum(bnd. Joh 5:29), marhite hamatean, hamatean na paduahon,
hamteam salelenglelengna. Manang aha na naeng gabe silas ni roha ni angka
namaringan di hasiangan na asing i, tung so boi tarhatahon manang tarpikkiran
(1 Korint 2:9). Taida manang aha di dok Kristus i dison taringot tu si:
1. Nasida ndang mangoli jala ndang
pangolihon: nasida naung bonot tu hasiangan na asing i nunga gok LAS NI ROHA,
ndang pola ringkot be las ni roha na ro sian pangoli. Saluhut angka las ni roha
haholongan na di portibi on na mian di bagasan ngolu pardagingon i, gabe mago
doi hinorhon nil as ni roha nang hagogok ni holong ni partondion. Molo dung adong
hasingkopan nang habadiaon i, siala ni ima ndang pola diharingkothon be
pangolion i laho manase dosa i. Di Jerusalem na imbaru i tung so boi do bongot
angka na ramun. Ndang mate be nasida, jala ala ni on umbahen nasida ndang
mangoli be. Di hasiangan on, margogo do nang hamatean i, alai di hasiangan na
asing “dipalao do hamatean i”. Tudos nasida songon surusuruan. Di nasida adong
hamuliaon dohot hatuaon (las ni roha). Sandok halak nabadia, uju bongot tu
banuaginjang, ingkon do gabe sabangso, jala sarupa do parjambaran (HAK). Nasida
ma na ginoaran angka Anak ni Debata. Uju masa parbagianan di teanteanan
taringot tu Anak i, disi do nang nasida dipabangkit gabe Anak. Siala ni ido
umbahen na didok, halak na porsea paimaimahon tingki pabangkithon nasida gabe anak
(Rom 8:23), ala andorang so ditobus pamatang i sian udean, pangainon gabe anak
ndang dope singkop. Nuaeng hita gabe angka anak ni debata ( 1 Joh. 3:2 – “Hamu angka haholongan! Anak ni Debata do
hita nuaeng, jala ndang dope dipapatar, manang na gabe aha hita sogot; alai
taboto do: Anggo dung patar Ibana, gabe suman ma hita tu Ibana, ai idaonta do
rupana sandiri). Na adong do di hita angka bangko haanakhon i alai tung so
singkop doi andorang so saut hita masuk tu banua ginjang. Nasida ma angka anak
naung pinahehe, jala naung parsidohot do nasida na laho manghilalahon ngolu di
hangoluan na naeng ro. Nasida sorang dihasiangan on alai nunga gabe ripe di
hasiangan na asing i. Nasida di ajari di hasiangan on, alai maruli teanteanan
di hasiangan na asing i. Ai taida ma, angka anak na dijanghon Debata ima angka
anak naung dipahehe, na ditubuhon di hasiangan na diginjang, na marsada
dibagasi tondi, jala na mangelhon dirina tu hasiangan on jalana gabe anak ibana
di hasiangan on. Jala naso boi tartabunihon tai ma na adong hangoluan na asing
dung ngolu sisaonari on (ay. 37 – 38). Abraham, Isak, Jakkob tutu naung monding
do nasida hatiha si Musa. Alai na boi do nuaeng dohonta, nasida na tolu
maringan hasiangan na asing, ala so Ibana Debata ni na mate alai Debata ni na mangolu
do. Lukas pasahathon: i saluhut do nasida mangolu di Ibana, ima nasida na
sintong situtu porsea, songon Abraham, Ishak dohot Jakkob. Jala mulak orbuk i
tu tano, pambuatanna hian, alai anggo tondi mulak tu Debata, nampunasa hian
(Parjamita 12 : 7), namangolu rap dohot Ibana songon Ama Ibana sian nasa tondi,
jala daging ni nasida ingkon mulak magolu di ujung ni tano on ala huaso ni
Debata, ai Ibana do Debata na pangoluhon angka naung mate (Rom 4:17)
Sipahusorhusoron
1.
Hamtean
ima na gabe mula ni hangoluan ta rap dohot Debata
2.
Sandok
halak Kristen ingkon jamot di angka pangajarion, tarlumobi taringot tu haheheon
sogot, hahomion ni Debata taringot tungolunta saonari dohot ngolu na naeng ro
3.
Manghaporseai
Debata mambahen hita umboto na adong do hangoluan dung hamatean
Hangoluan na manontong tu marimba situtu doi dohot
ngolu portibi on nuaeng. Jumolo porsea ma hita tu Kristus na manontong i, asa
ta antusi manang na songon dia ngolu na manontong i dohot pangantusion na
sintong. Ai Ibana sandiri do hatongtongon i jala sian Ibana do mula ni
hatongtongon na tu hita i.
Tidak ada komentar:
Posting Komentar