Bahan Jamita, Minggu 24 Juli 2016; 1 Musa 18 : 20 - 32

 1 Musa 18 : 20 - 32 

Hasintongan ni Debata tarida sian Huaso-Na

Patujolo

Sai dipamanat Debata do ianggo roha ni jolmai na mardosa i; ai sai diparrohaon Debata do angka hajahaton, ketidakadilan jala pangalaho pangalangkupon na niulahon ni na tinoimpanai (bd. 1 Musa 4:10; Psalm 34:18; Jak. 5:4).

Songon sahalak anak ni Debata naung dibagabagahon pasupasu, laon disi do nang jolma i mangadopi ragam ni angka ujian  laho patuduhon manang patangkashon manang na tau do ibana manjalo asi ni roha nang pasupasu i. Pasu-pasu i sasintongna dilehon ndada holan asa di panghilalalhon marsasahalak, alai pasupasu dil;ehon tu sasahalak, asa halak na asing pe boi taruli.

Tu si Abaraham, patolhashon sangkap ni rohaNa, ima parsorion ni Sodom dohot Gumora, ala dosa ni saluhut pangisi ni huta na dua i. Ai gok hasintongan do Debata, siala ni ima ingkon do hona uhum angka jolma na mangulahon dosa.

Diboto si Abraham do si Lot maringan di Sodom hombar tu na tinodo ni rohana hian. Nunga hea dipasahat si Abaraham asi ni rohana i laho paluahon si Lot sian bangso na manghurungkon ibana (1 Musa 14). Alai, marsihohot do si Lot ingkon hot ibana di Sodom. Nuaeng, dung diboto si Abraham sangkap ni Debata, aha ma na naeng ulahononna muse?

Roha hasintongan i tubu di roha ni si Abraham nang pe sasintongna ndang apala adong be tanggung jawab penuh tu si Lot, atik pe ibana tulangna. Ai nunga ditodo ibana sandiri dalanna, jala songon sahalak naung magodang ibana, ingkon rade do ibana manjalo hombar tu parulaonna sandiri. Alai ndang i na ni ida ni si Abraham. Diparetongkon si Abraham do manang na songon dia annon hata ni jolma maradophon Tuhan i, molo dipasombu halak na tigor roha di pamate rap dohot halak pardosa i. Hasintongan ni Tuhan i, ingkon do jungjungon. Abraham mambahen sada pangondianon holan ala hamuliaon ni Tuhan na ingkon marsihohot.

Hatorangan

Sodom dohot Gumora ima dua huta na diujung ni laut Mati. On ma huta na ginoaran ni ginorgoran holan asa pamosokkon, paiashon hajahaton ni jolma. Jala on ma haroro ni Tuhan i na laho managarongsohon marhite na mamboan uhuman dohot hasesego na tung mansai posa maradophon halak na gok dosa i.

Disiala naung dibot si Abraham do sangkap ni Debata i, ndang dihalomohon ibana hamamate ni si Lot rap dohot angka na tangkang roha i. Dihalomohon ibana do ingkon malua si Lot. Umbahen i do uju naeng pamasaon ni Debata nama uhum i tu Sodom dohot Gumora, marhite surusuruan ni Debata. Debata sandiri pe, tung mansai manghaholongi si Abraham, umbahen na gabe sangkap ni Debata i ingkon diboto si Abraham.

Uhum na so tarjua do ianggo uhum na tu Sodom dohot Gumora. Ai pola sahat didok: Maungaung do angguhangguk badar sian Sodom dohot Gumora, aia manahatang do dosanasida (ay. 18). Sada pandohan na masa holan maradophon huta Sodom dohot Gumora. On ma na pabotohon, nunga tung saluhut be pangisi ni huta i mangulahon na so tama maradophon Debata.

Diharoro ni suruan ni Debata manjumpanghopn si Abraham, hinorhon holong ni rohana mida si Lot, sai dipapingkirpingkir ibbana do dalan asa nian malua ibana. Marhite hata “Tawar menawar” tu Debata, dalan paluahon si Lot. Manang na marpigahali masa tawarmenawar i: 50 halak na tigor roha, paluaon ni Debata do ianggo Sodom dohot Gumora. Ai didok Debata ndang sibunuon halak na tigor rap dohor parjahat i (a. 24-26). Taida ma roha na tngkas pangelehon di si Abaraham. Pola sahat dirumari dirina jala diparsoada, holan asa dipasaut Debata na pinangido ni rohana (ay. 27). Ai tibu jumpang didok rohana, tung na so adong do jumpang lima pulu halak angka na tigor roha di Sodom dohot Gumora. Dipaelekhon si Abraham muse asa gabe opat pulu lima halak, sahat muse tu na opatpulu, tu tolupulu halak, tu duapulu halak jala na parpudi sahat tu na sampulu halak. Alai ndang marnajumpang disi ianggo halak na tigor roha. Umbahen ingkon do saut na sinangkapan ni Debata.

Sipahusorhusoron – Siboanaon tu jamita

1.       Parange ni si Abraham na gabe barita na ringkot siidaon sian turpuk jamita on:

a. Roha na peduli maradophon parsorion ni halak

b. Roha pangelehon maradophon uhum na sahat tu halak na asing

c. Rohana maradophon Debata, na pola sahat tu na patutoru dirina maradophpon Debata

2.       Roha na marpamuati sian Debata. Sintong do umbalga asi ni roha ni Debata sian uhumna. Sai na marpamuati do roha ni Debata mida angka pardosa

3.       Arga situtu do halak na tigor roha diadopan ni Debata. Arga situtu do si Abaraham di Debata. Pola dipasahat tu ibana sangkap ni Debata.

4.       Ndang dihalomohon Debata hamamate ni halak na tigor roha rap dohot angka parjahat i. Siala ni ima: gabe jolma na denggan roha ma hita di ganup humaliang hita, ai tung songon dia pe parsorion ni sada luat ala ni dosa i, ndang sai hot do holong ni rohana diangka na denggan roha maradophon Debata

5.       Arga situtu hita diadopan ni Debata, alai ndang i na gabe pasundat uhum ala dosa ni jolma i. Uhum dipasahat Tuhan  i holan asa dibot jolma i na adong do Debata, jala asa mulak tu lomo ni roha ni Debata.

6.       Antong, mulak ma hita tu Debata, ai sai dipaima do haroronta, nang pe naung sala hita disandok dalanta, alai diloas dope hita mulak tu dalan na sintong i.