Ev. 2 Korint 5 : 16 - 21
Ngolu Naimbaru dibagasan Kristus
Patujolo
Di bangso Indonesia on, adong do 6
ugamo na diakui, nang marragam angka aliran kepercayaan. Sian na 6 on, nang sian angka aliran
kepercayaan i, saluhut na do mangarahon jolma i asa tu hadengganon, hadameon,
las ni roha, mangajarhon hasintongan (keadilan). Tarlumobi ma di ugamonta,
KRISTEN na tongtong mangondolhon saluhut angka bangso na pinillit i ingkon
mangolu dibagasan hatiuronNa, na tumadingkon haholomon (patudos: 1 Petrus 2:9).
Jadi sandok halak na marugamo, sasintongna ingkon patuduhon sada perubahan di
sandok parngoluonna, ai molo ndang i, tudos doi na marsoadahon Tuhanna jala
mangagohon lapatan ni ugamo i sandiri. Ugamo i unang holan partanda i, alai
ugamo i sandiri ingkon boi paubahon ngoluna tu na lobi denggan. Alai taida ma
nuaeng on, justrus halak na marugamo i do na patuduhon haurahon, na so olo
mardame jala ndang menghargai jolma na asing, antong aha do imbar ni halak na
so marugamo dohot na so marugamo (atheis)?
Hatorangan – Aplikasi ni turpuk
Hata “mangihuthon pardagingon” (ukuran
manusia) na diadophon tu hata “dibagasan Kristus” marlapatan doi ndang ala lomo
ni roha ni jolma i sandiri be mambahen sada ukuran tu sandok na adong di
nasida. Ala jolma i ndang be badia, alai nunga be dibagsan gok dosa. Hinorhon
ni dosa i, na boi na ma sandok angka naung nidok manang naung piningkiran ni
jolma i gabe mubauba, jala ndang ala ni hasintongan. Hape sasintongna, halak na
mandok dirina naung mangolu dibagasan Kristus, ingkon jumpang do sada perubahan
tu hasintongan. Ai halak na dibagasan Kristus, sasintongna naung diojakhon do dirina
tu bagasan Kristus i gabe marparange songon Kristus i sandiri, Galatia 2 : 20:” 20
Ndada ahu be na mangolu i nuaeng;
Kristus do mangolu di bagasan ahu. Ia mangolu pe ahu nuaeng di bagasan daging,
mangolu marhitehite, haporseaon di Anak ni Debata, na mangkaholongi ahu jala na
mangalehon dirina humongkop ahu. On ma halak naung mangolu dibagasan
Kristus. Halak na porsea tu Kristus tarida doi sian ngolu naung dipauba
dibagsan Jesus Kristus, gabe mangolu hombar tu lomo ni roha ni Kristus do
ibana, ndang ala rohana sandiri manang roha-roha portibion (pardagingngonna). Gabe
ditadingkon ma pangalaho jala roharohana na parjolo, ai sasintongna tu mansai
maol do paluahon i, jadi ringkot situtu do ingkon margogo jala marhabaranion do
halak Kristen laho manggotaproharoha haportibi on i, asa unang holan goar na
mangolu dibagasan Kristus, alai parulaon diluar ni Kristus. Jala saluhutna i
ditingkina i ingkon dipertanggungjawabhon doi. Pertanggungjawaban na sintong i
ima molo hombar tu pangondolhonon ni Hata ni Debata. Pangalaho ni ha_kristenon
i dipahombar tu pangalaho manang pambahenan ni Kristus. Kristus i naung mate
jala hehe gabe jolma na imbaru. Siala ni ido ngolu na buruk ni halak Kristen i
nunga be mate dibagasan hamatean alai hehe dibagasan ngolu na imbaru (sai
songon na tinompa na imbaru jolmai, tinompa ni tangan ni Tuhan i muse). Ndang
jumpang be di bagsan hadirionna na gabe ukkuran ni hajolmaon, alai nunga be
ukkurabn dibagsan Kristus. Ai songon si Paulus na uju i, na gabe sipangalelei
siihuthon Kristus i, nunga be marhamubaon tu na lobi denggan muse, ima na gabe
sibaritahon Kristus i. Mandok hata marhangoluan na imbaru, ra tung mansai mura
doi jala ndang pola dokdok i, alai sasintongna tung mansai maol doi ianggo laho
ulahononton. Siala ni ido, tompa na imbaru ndada ro sian hagogoon manang
roha-roha ni jolma i sandiri, manang sian angka halak na asing na adong huaso
manang talenta dibagasan hadirionna, alai tompa na imbaru i marharoroan sian
sangkap dohot lomo ni roha ni Debata. Tompa na imbaru masa i molo olo Debata
laho manesa dosa ni jolma i. Tompa na imbaru, berarti Debata mangula dibagasan
jolmai.
Marhite pardamean na pinatupa ni Debata
dohot jolma i marhitehite Kristus i, ima na olo Debata manang Debata sandiri do
na ro mandapothon jolma i asa mardenggan. Ndang songon jolma, ingkon ma marsala
i do ro manjumpanghon na sintong i, alai ianggo Debata, ndang songoni. Umbahen
i do, pardamean i ndang na gabe jolma i na manesa parbadaanna dohot Debata,
alai Debata sandiri manalesei. Ndang tarpatupa jolma i hadameon i maradophon
Debata, ai maradophon dirina sandiri pen dang boi dope jolma i patupahon
hadameon.
Jadi haroro ni Debata mandapothon jolma
i, marlapatan doi na olo Debata mangalupahon manang ndang manjujur hahurangan
ni jolma i. Ai diboto Debata na gale do ianggo jolma i, jala diida Debata doi
adong di ngolu ni jolma i. Pardamean i sandiri dipatupa marhite haroro ni
AnakNa na sasada i tu portibi on, jala tarsilang jala mate. HamateanNa i nunga be pangosinghon saluhut
angka na paholanghon jolma i dohot Debata. Hadameaon na dipasahat ni Debata tu
jolma, ndang tarasam i, ndang tartuhor i, siala ni sasintongna, hadameon na
ditawarhon ni Debata nunga gabe daya tarik i asa olo jolma i ro manang mulak tu
Debata. Asa sada dohot Kristus songon Nasida naung sada i.
Siboanon tu jamita
1. Goar ni minggu sadari on ima: Letare: Marlas ni roha ma
hamu, manogihon sandok halak Kristen asa marlas ni roha. Aha ma sihalashonon ni
jolma i nuaeng? Sada partingkian manang sada kesempatan dilehon jolma i nuaeng,
marhite panogihonon ni turpuk jamita on asa gabe tompa na imbaru nasida
dibagasan Kristus i. Unang sanga salpu, binsan sadihari dope, asa nian jolma i
marhamubaon. On sihalashononton, ndang lomo roha ni Debata mate hita, alai
naeng ma dipaimbaru hita dibagasan Kristus i. Ai nang tu si do hita dijou, tu
parsaoran dohot AnakNa naung mate di hamatean i jala hehe tu hasangapon, laho
pangoluhon hita na mate ala ni dosa i jala hehe tu hasangapon.
2. Hadirion ni halak Kristen ingkon gabe tiruan tu sandokluat
nang halak pe. Unang be gabe holan goar i ha_Kristenon i, alai pangalahonta ma
i paboa na hita siiuhuthon Kristus jala na mangolu dibagasan Kristus.
3. Marhamubaon ni roha marhite na pasahathon dirina tu Debata.
Ai na maol situtu doi ianggo na marhangoluan na imbaru, alai molo dibagasan
Kristus i do dipasahat jala diampehon ngoluna, sai na pargogoan ni Tuhan i do,
gabe tompaan na imbaru
4. Songon na nidokna nangkin: tompa na imbaru ndang sian
roha-roha ni jolma manang sian halak na asing i, alai holan sian sangkap dohot
loo ni roha ni Debata doi. Siala ni psahat ma dagingmu, rohama, nang sandok
parulaonmu. Loas ma Tuhan na mangula di ngolum. Bolokkon sian rohami luhut na
so ture, alai na sian Tuhan i, ramoti ma ma sude.
5. Las do roha molo uli nang gareja i, alai gareja na
sasintongna ima roha nang ngolunta siganup ari.
6. Ha-Kristenon ta i ndang “PANGKAT” manang “Holan goar
kebanggaan i” alai nang ma jumolo hita bangga ala ni hadengganon, hasintongan i
gabe tutu targoar hita halak Kristen. Pangalaho dohot parulaon i do mamboan
hita tu KRISTEN na sejati.
7. Padame ma dirim tu dirim, donganmu dohot tu Debata!
Tidak ada komentar:
Posting Komentar