Bahan Jamita Epistel 06 Maret 2016: Josua 5 : 9 -12

Nas: Josua 5 : 9 - 12

Gohi hamu ma na pinangido ni Debata, asa malua hamu!

Ndang pola sadia leleng nari, bongot nama hita tu parningotan di ari hamamate ni Jesus (Jumat Agung), dohot Paskah (Ari Haheheon ni Jesus sian na mate), laos dibagasan minggu-minggu on, nunga dipaingothon tu hita asa adong pangaradeon taringot tu si. Minggu on ima minggu LETARE (Marlas ni roha ma hamu), laos on ma minggu Passion na palimahon (PASSION V). Pangaradeon dia do huraha na ringkot taringot tu Paskah on? Sungkunsungkun na sisongoni boi sajo doi gabe tubu, alai sasintongna sungkun-sungkunon ma na patangkashon tu hita na hurang tangkas dope pangantusionta taringot tu Paskahi sandiri jala ndang taboto aha do paskah i jala boha do tutu panghorhon ni paskah i tu hita sandiri. Salpu boti do sipata Paskah so martanda di hita, sae songoni do ulaon Paskah i dihita sio marpanghorhon na denggan di hita. Ai boasa so marisuang di hita Paskah i, ai hita sandiri pen dang tangkas pangantusion jala ndang adong pangaradeon gabe mambahen hita ndang manghilala manang na songon dia do hinatabo ni parbue ni PASKAH naung pinarade ni Debata di hita. Antong, marhite turpuk jamita sadarion taparade ma rohanta, asa rap mangauhon hita taringot tu paskah, asa marlaba hita na marpaskah:

Hatorangan

Taboto do tangkas manang na songon dia parngoluaon ni bangso Israel saleleng nasida maringanan ni Misir. Termasuk mai hangoluan ni parugamoon ni nasida (partondion), na so apala sintong, banhkan boi dohonon nunga be sega partondion ni nasida. Ai manang songon dia na masa di Misir, i nama dipaihutihut nasida, jala godang do nang nasida na manghalomohon ulaon sisongoni, songon na ni ula ni bangso Misir. Hinorhon ni ido, ndang diloas Debata bangso Isarel na ruar si Misir bongot tu tano na niuarihon ni Debata (Kanaan), asing ni si Josua dohot si Kaleb (4 Musa 13 : 30 – 14:38; 5 Musa 1 : 36). Laso songoni do nang taringot tu ulaon Paskah, tung na so jadi nasida boi mangulahon i, ia so jolo digohi nasida saluhut na pinangido manang naung niaturhon ni Debata, tarlumobi mai masalah SUNAT. Halak Israel ingkon jolo di Sunat do asa boi nasida mar-Paskah. Jadi pandohan ni Debata dison taringot tu “manggulangi haurahon Misir” (CELA MESIR)ay. 9: ndang taringot tu parulaon ni Misir tu nasida manang sotaonon ni nasida saleleng nasida maringan di Misir, alai manundati satongkin (penundaan) pelaksanaan ni perjanjian ni Debata dohot si Abaraham na ditandai marhite SUNAT (bnd. 1 Musa 34:4). Nang pe naung dipalua nasida sian Misir, jala naung dipasada nasida dohot Debata marhite Parpadanan di Sinai, alai dipasohot nasida doi marhite angka ulaon na maralo tu Debata ima marhite angka ulaon na manomba debata sileban (ganaganaan) tarsongon halak Misir (2 Musa 16:3; 4 Musa 11:5, 18; 14:2-10; 16:13). Hinorhon ni pangalaho ni nasida, dipangidohon si Musa asa marhamubaon ni roha nasida (bertobat) marhite tanda SUNAT (5 Musa 10:16). Uju rap nasida dohot angka malim (imam) ni bangso Israel bongot tu tano parpadanan i jala dipatuduhon nasida roha na marpangoloi di sude angka syarat-syarat na nilehon ni Debata, marhite na olo nasida di Sunat, hinorhon ni roha na maila ala ni parsombaon ni nasida tu ganaganaan i dohot hagiot ni daging na binoan manang na niiuhuthon nasida sian Misiri i, ingkon dipasiding manang dibolongkon. Didok goarna GILGAL na parjolo lapatanna: lingkaran gabe “mandabuhon” (menggulingkan: bnd. Jos. 4:19 – 5:1). Jadi boi dohonon, Sunat ima horong na parpudi dipangaradeon ni Debata maradophon bangso-Na andorang so mangulahon PORANG na BADIA (Perang SUCI). Ala bangso Kanaan nunga be tung masnai tahutan, laos dison ma diparentahon Debata angka suruanna asa paradehon diri marhite sunat, songon syarat laho mangulahon PASKAH (2 Musa 12:44, 48). Laso ditupuk, ima nasida naung na marsunat (naung manggohi lomo ni roha ni Debata), gabe tau nasida manganton sagusagu (gogo ni tano i), sae ma nang Manna i ai nunga di lehon Debata be dinasida gogo ni tano i laho hangoluan ni nasida, jala ndang jadi hahurangan be nasida di sipanganon pola manipat sataon bolon di Kanaan.

Sipahusorhusoron/siboanon tu jamita

a.       Paskah : ima pesta na parjolo sian tolu pesta nab alga na niulahon ni halak Heber. On ma parningotan taringot tu surusuruan hamatean (Malaikat maut), na mandapothon bagasa ni Israel uju masa pamatehon anak siangkangan (anak sulung) di tano Misir (jolma nang pahanpahanan), andorang so ruar dope bangso Israel sian Misir. Didok do on muse: pesta roti na so ni ragian (pesta roti tak beragi). Birubiru Paskah na sineat songon partanda ni Kristus dohot na tinaon-Na. Paskah ni halak Kristen ima Parsaoran na Badia (Perjamuan Suci).

b.      Paskah ima sada ulaon na ringkot di halak Kristen, ala marhite sian Paskah i boi dapotonta:

1.      Hatigoranta : Rom 4:25; 8:34)

2.      Hasesaan ni dosa: 1 Kor. 15:17

3.      Panghirimon: 1 Kor. 15:19

4.      Dasar ni haporseaon: 1 Kor. 15:14, 17

5.      Jala sian on ma idaonta hinasintong ni Anak ni Debata ia Ibana (Jesus)

c.       Jadi hinorhon ni, saluhut halak Kristen ingkon:

1.      Mangarede na sintong laho mangulahon paskah, asa unang holan hasomalan sambing be na marpaskah i

2.      Pangaradeon i, ima pangaradeon tu hamubaon ni roha

3.      Pangaradeon ndada holan hata, alai adong sada tanda na tutu situtu jumpang hamobaon ni roha

4.      Halak na olo marhamubaon ni roha do na sasintongna boi bongot jala mangulahon paskah.

5.      Halak naung taruli sian asi ni roha ni Debata marhite hasesaan ni dosa i, jumpang ni ibana ma hangoluan, ndang hurangan be, jala gok las ni roha ma nasida.

6.      LETARE: marlas ni roha ma hita manomunomu haroro ni haluaon i dihita, ai nunga dipaimbaru Debata hita, marhite hagogok ni parpadananta dohot Ibana. Antong, marlas ni roha ma hita, ai saut do haluaon di tajalo sian Debata.