Bahan Jamita Minggu 20 Desember 2015, advent IV, heber 10 : 5 - 10

Heber 10 : 5 - 10 

“Dibagasan lomo ni rohaNa i gabe badia hita”

Patujolo

Panurat ni bukku on tung tangkas do mangondolhon taringot tu haporseaon. Haporseaon i do manontuhon manang na songon dia do parngoluon ni halak Kristen. Haporseaon na i do na patuduhon hadirionna na gabe halak Kristen, ndang holan panjouon manang goar sambing. Haporseaon i ndang muba-muba tung masa pe angka ragam ni pangarupaon, panginsahion, pangaleleon nang angka ala ni arta portibi on. Al nunga lam godang halak Kristen na tumadingkon haporseaonna hinorhon ni hinauli ni portibi on dohot godang ni angka sitaonon nang sian halak na asing/ugamo na asing nang sian donganna/ugamona sandiri. Nuaeng ma naeng tangkas pangondolhonna tu saluhut halak Kristen, mandok: Jesus Kristus i ima hataridaan/hasasaut ni bagabaga ni Debata na sempurna. Jesus i Anak ni Debata, Anak na manontong (kekal) naung patuduhon harohaonNa nang pambahenanNa na mamelehon diriNa tu haberniton nang hamatean. Jesus sandiri do nang “SINTUA NI MALIM” na badia na lobi timbo sian saluhut angka sintua ni malim diportibi on. Siala ni i ma, Jesus ma na gabe parhitean i, asa sandok halak na porsea gabe malua sian dosa, sian biar ni roha dohot hamatean i.  Jadi sian saluhut naung ni taringotan ni panurat Heber on, ingkon satia ma halak Kristen, ai Jesus do sidaon na gabe tiruan na rade manaon angka na porsuk nang pangarupaon i. Pangarimpunanna: Ngolu ni halak Kristen ni ida di ujungna ndang di bona na.

Hatorangan ni turpuk

Ayat 5: On ma na patandahon hata na tarsurat di Psalmen 40 : 6 - 8, na patuduhon na so dihalomohon Debata pelean di Padan Na Robi ala ndang mardongan ngolu na marhaporseaon. Psalm 40 : 7, manggombarhon Mesias na naeng ro i ima na laho mambahen las roha ni Debata. Nang hata on pe patuduhon hadiron ni Kristus i andorang so ro do pe (pre-eksistensi Kristus: Joh 1:1-2, 8:57-58; 2 Kor 8:9; Plp 2:6-7; 1 Joh 1:1). “daging i do dipauli Ho di Ahu”: Hata on mangihut sian Psalm 40:6. Hata on naeng patangkashon, molo Jesus i na sintong do Ibana naung gabe JOLMA (marasing sian pemahaman gnostisisme: agama na dualistik yang dipengaruhi dan mempengaruhi filosifi ni halak Junani, Judaisme dohot Kristen; gnosis: Pengetahuan, manusia ciptaan Allah bukan ciptaan Allah yang sempurna)

Ayat 6: Manang na piga-piga di Padan Narobi (1 Sam 15:22; Jes 1:11-17; Hos 6:6; Amos 5:21-27, Mikha 6:6-8). Ndang boi bahenonta pangantusionnta, na so dijalo Debata manang ditulak Debata do pelean  i. , alai na so hinalomohon ni Debata ima naung gabe mangalului pangomoan sambing do nasida sian pamelon i. Nunga be dipauba nasida pameleon i gabe holan ritual manang liturgy sambing, ndang be gabe tu hamubaon ni roha (pertobatan) dohot haporseaon na sintong i. Ndang dijangkon Debata ulaon na holan sisongoni Na so manggombarhon roha nang ngolu na marhaporseaon (Jes. 1).

Ayat 7: “Di pustaha i do tarsurat taringot tu Ahu.”( Bukku padan Na Robi disurathon mar ponggol-ponggol di gulungan kulit. Gulungan Bukku Laut Mati na jumpang di taon 1947, na dibagasanna panuraton sian si Jesaya pola sahat tu 29 kaki ganjangna (hampir 10 meter). “Mangulahon lomo ni rohaM.” Lomo ni roha ni Debata ima sada padan na imbaru tu sandok jolma naung ditotophon marhite hamatean nang haheheon ni Jesus (Mar 10:45; 2 Kor 5:21; Heb. 10:9). Tarsongon dorbia na naeng pelehonna na tinogu tu pamotongan, na so margogo be, suang songoni do nang Jesus sian bulus ni rohaNa pasahathon diriNa (Joh 10:17-18).

Ayat 8: “Pelean” (KORBAN): Sian na tarsurat di ayat on, nunga patuduhon hasisinggkop ni rohama ni pelean (3 Musa 1-7). Hata “mamemelehon” {berkorban} secara harafiah marlapatan do i pelean pardamean sian ias ni roha . Panombaon i pe sian ias ni roha nang pelean situtungon ingkon sintong doi sian ias ni roha ndang na so tarjua, pameleanon na boi dipanghilalahon torop jolma. Pelan Pardosaon (“hasesan ni dosa”), on ma horong pemeleanon wajib na digoar di 3 Musa 4 – 5. Jala na dipelehon mangihuthon patik, na mandok na tumimbo do pamelehonon ni Jesus sian pamelehonon ni marga Levi. Bahkan, uju pemeleon di Padan Narobi diulahon mangihuthon aturan na sintong, saluhutna i holan na manggombarhon ulaon ni Kristus i doi.

Ayat 9: Debata sandiri do na pahothon parpadanan i. Hata naparjolo i, ima parpadanan ni Debata dohot si Musa (Kolose 2:14). On ma pangungkapon na sian Debata na manontong (Mat 5:17-19). Paulus sandiri jotjot mambahen surat di Padan Narobi na gabe poda tu saluhut halak na porsea. Alai saluhutna i ima langkah/cara na parjolo (Gal. 3). Jala nunga jumpang hagogokna di Padan Naimbaru dibagasan Kristus. Na paduahon ima Padan Naimbaru (Jer 31:31-34; Hes 36:22-36) di bagasan Jesus.

Ayat 10: “gabe angka na badia hita”,  Sasaran ni ha-Kristenon i ima gabe halak na sintong, jala on do na tujuan ni Padan Narobi. Habadiaon manang pabadiahon ima panesaan manang pamagohon angka “bura” (kutuk) jala upa ni hadabuan i (1 Musa 3), naung gabe ramun do GOMBAR ni Debata di bagsan hajolmaon i. Padan Naimbaru mandok halak na porsea dipasintong ala ni alus sian hamubaon ni roha ala haporseaon di pangkophopon ni Debata marhite Jesus AnakNa. Sahali do malua, jala diingani Tondi parbadia (roha nang partondion na imbaru) asa sarupa dohot Kristus (Rom 8:29; Gal 4:19; Ep 1:4). Pabadiahonsa, ima na poubahon hadiron ni hajolma on di adopan ni Debata jala pangalaho na imbaru i tarida dibagasan parngoluan siganup ari. “binahen ni daging ni Jesus Kristus,” Saluhut jolma naung madabu i ndang be mangalului Debata (Jes 53:6; Rom 3:10-18); gabe Debata sandiri do na mangalului jolma i. Diparade Debata do sada dalan tu jolma i asa mulak nasida tu parsaoran dohot Ibana (Mar 10:45; 2 Kor 5:21; Jes 53). “sahali i, tu na saleleng ni lelengna.” On ma na patuduhon huaso ni Debata na tarlobi (7:27; 9:12,28; 10:10) sian pamelehonon ni padan ni si Musa na marulak-ulak i (ay. 11 – 12). Saluhut ulaon na marhadomuan tu haluaon ni sandok hajolma i nunga be diparade. Saonari na ringkot ulahonon ni jolmai ima mangalusi saluhut na pinsahat ni Debata sebagai tawaran tu jolma i marhite haporseaon. Saluhutna do boi ro (Rom 10).

Siboanon tu Jamita

a.        Debata marhite AnakNa Jesus Kristus, tu portibi on manggohi bagabagaNa laho paluahon jolma i, ima marhite hasesaan ni dosa ni jolma. Dosa ni ise do na sesa? Ima dosa ni halak na porsea tu Jesus dibagasan haporseaon na polin

b.        Dipatorang do tu hita taringot tu sude naung di ulahon Jesus humongkop jolma i, nuaeng boha do jolma i mangalusi i?

c.        Boasa di turpuk on dipatorang sude parulaon ni Jesus dung magodang Ibana, manang barita panghobasionNa di pabotohon di Advent on? On ma na pabohon tu sandok jolma, ise do na pinestahon nasida, asa diboto jolma i, na ro i manang na songon dia parulaonNa jala manang na songon dia do lomo ni rohaNa, gabe sintong tarjalo jolma i haluaon na binoan ni Jesus i tu portibi on.

d.        On pe, tanda ma Jesus mangihuthon haporseaon, jala janghon ma Ibana dibagasan roha na sintong, huhut somba ma Ibana marhite pelean sian serep ni roha jala na sintong mamelehonsa. Amen!