Bahan Jamita Minggu, 08 Nopember 2015: HEBER 9 : 24 - 28

Ev. Heber 9 : 24 - 28 

Ise na dohot tu BANUA GINJANG?

Patujolo - Hatorangan

“DOSA”, sada hata na tung mansai mura dohonon, jala ndang pola mabiar iba mandoksa {nang mandok tu diri niba sandiri na maradophon halak na asing}. Mandok hata “dosa” ipe ndang sala, jala ndang adong ora-ora manang patik mandok: “ndang boi mandok manang manurathon hata “DOSA”. Alai, molo tapaganjang, jalo molo sai taparrohaon hata on, sasintongna holan manjaha hata on pe, nga sasintongna ingkon gabe mallobok taroktok, lam ma muse mandok, ingkon humitir nian iba, hinorhon dokdok manang balga ni panghorhonna di ngolu niba siganup ari nang tarlumobi di hangoluan sogot.

Nang halak Kristen, ndang sisada pangantusion tringot tu dosa i sandiri. Godang do halak na sala mameakhon panghorhon ni dosa. Adong doi na paboratborathon laos adong do muse na paneangneanghon panghorhonna, isarana di hata na didok di Bukku Ende: No: 174 : 3:”pardosa ho didok roham, na so tama be dohot? Ndang pola ala ni dosam, umbahen na sundat bongot…d.u.” Sian hata on boi do halak mandok gabe neang do dosa i, ala Jesus sandiri do na mangula, ndang adong parulaon ni jolma laho manesa dosana sandiri. Manang. Boi do sae dosa i holan ala pambahenan ni Jesus na manobus, ndang adong pambahenan ni jolma i (manusia bersifat menunggu, passif). Boha hita, songoni do pangantusionta taringot tu dosa dohot panobusionna? Molo songoni do pangantusionta taringot tu dosa i, taida ma jo gombaran ni maol ni halak di Padan Na Robi laho pasesahon dosana. Pola do godang syaratna asa sesa dosana, jala ingkon sahat doi tu sintua ni malim na mangula di joro i. Ingkon marulak-ulak do sintua ni malim i bongot tu bilut na badia i, mangidohon hasesaan ni dosa. Nang ragam ni angka pelean situtungon (3 Musa 1 : 1-17; 7:8) ingkon pelehononton holon manghirim di hasesaan ni dosa i (patudos: 3 Musa 8:15; 17 : 4 -11; 2 Musa 29:21; 5 Musa 12 : 5 - 18). Alai, tung songon dia pe gok ni aturan i, manang songon dia pe pambahenanna taringot tu ulaon na manesa dosa, ndang sae i laho manesa dosa sasingkopsingkopna (tidak ammpu menyelesaikan masalah dosa secara tuntas). Siala ulaon parsombaon i holan sada gombaran parsombaon na denggan doi sian parulaon ni Tuhan Jesus naung diulahon Ibana (ay. 21).   Dosa i, ima sada sipingkiran manang sada masalah na tung mansai ringkot situtu doi, jala holan Debata do na boi secara tuntas pasaehon i. Molo sian padan na robi, mudar ni pahanpahanan do dibahen laho pabadiahon marhite pameleon, jala dipispishon tu parpeleanon i (kemah suci), nang tu angka na asing dohot tu jolma i sandiri. Hape sasintongna, dosa i ingkon dipasae marhite sian pamelean na sasintongna ima marhite mudar ni Kristus i sandiri. Siala ni ido umbahen na disuru Debata, AnakNa na sasada i tu tano on laho pasaehon dosa, ima marhite na manggantihon (mewakili) jolma namardosa di adopan ni Debata (Ay. 24). Aha do huroha halobian ni Kristus i sian Sintua ni malim i, angka pomparan ni si Harun i? HalobianNa ima: diriNa sandiri do na dipelehon, ndang be dorbia manang na asing hombar tu patik ni parpeleanon i. Jala ndang marulakulak songon parulaon ni sintua ni malim i, alai sahali do Ibana ro jala mangalehon diriNa na gabe pelean, pelean hasesaan ni dosa. Na manghorhon tu haluaon ni sandok jolma nang tano on (ay. 25 – 28a). Parulaon na ni ulahon ni Jesus, ndada holan na masuk tu bilut nabadia di joro i, alai surgo i do na dibongoti Ibana, na mambahen saluhut halak na porsea di Ibana, gabe parsidohot bongot tu si. Saonari, saluhut angka anak ni Tuhan i, marnida, mandai jala manghilalahon asi ni rohaNa nang pasupasuN, ima haluaon i nang pe so pola singkop dope nuaeng, alai sogot di haroroNa na paduahalihon, saluhut ma jolma i manghilalahon hagogok ni haluaon i (ay. 28b).

Siboanon tu jamita

1.     Sahali do partingkian (kesempatan) di hita laho mambongoti banua ginjang i. Naung parsidhot do hita di mudar na badia naung pabadiahon hita? Ai ndang adong dua hali partingkian laho pabadiahon hita, sahali do diseahon Tuhan diriNa na gabe pelean laho manobus hita.

2.     Boha do hita mangalusi manang me-respon pambahenan ni Jesus namambahen hita tau di hasangaponNa (hadiraNya) ganup ari?

3.     Boha do hita marpangalaho tu dirinta sandiri nang maradophon halak na asing taringot tu barita on?

4.     Totop do hita mangidohon asi ni roha sian Tuhan i di hasesaan ni dosanta, nang dibagasan tangiangta. Tabahen do sada pengakuan na pardosa hita, alai ndang adong jumpang hamubaon. Dosa na disesa i, ido muse dosa na taulahon. Marulakulak dosa i na taulahon i, hape nunga tapangido asa disesa dosanta.

5.     Porsea do hita naung disesa Jesus dosanta uju tapangidohon hasesaan ni dosa? Ganup minggu di partangiangan ni huria i sai tabahen do “tangiang manopoti dosa”, boha: SESA DO TUTU DOSANTA na tapangido i?

6.     Tangiangta jotjot do ndang hombar tu asi ni roha, ala tangiangta jotjot doi patuduhon hajagoonta, huasonta, hape ndang marhuaso hita tu dirinta sandiri, tarlumobi taringot tu haluaonta nang hasesaan ni dosanta. Tadok: sesa ma dosangku, asa hujalo pasupasu. Tapauba ma jo tangiangta mandok: sesa ma dosangku, jala ndang ulahononku be i! Asa unang marisuang panghopkopon ni Jesus i na tu hita.

7.     Ende 528 = tu banua ginjang, manang tu na rook!

Dosa (Heber: khatta’t; ‘awon; pesya’ra; Gorik: hamartia: dosa adalah kegagalan, kekeliruan, pelanggaran, kelalaliman atau ketidakadilan) parulaon ni sasahalak jolma manang rap dohot na manirpang sian lomo dohot uhum ni Debata; manang: saluhut hubungan na sala tu Debata, ido dosa {Rom 14:23} torop i sasintongna ingkon:

a.       Ditopoti (diakui): Job. 33 : 27; Poda 28 : 13

b.       Dihasogohon (dibenci): Psalm 97 : 10; Poda 8:13; Amos 5 : 15; Rom 12:9

c.        Dibolokkon (dibuang): Job 11 : 14

d.       Dipaholang (dijauhi): Psalm 34:15; 1 Tes. 5:22; 2 Tim. 2:19

e.       Dialo (dilawan): Heber 12 : 4

f.         Dipamate (dimatikan): Rom 8:13; Kol. 3:15

g.       Dipamate huasona: Rom 6:6

h.       Holsoan ala mardosa:   Psalm 38 : 19; Jer. 3:21

i.         Dungo, asa unang mardosa: Psalm 4:5; 39:2