Bahan Jamita Minggu, 26 Juli 2015 , Minggu 8 Dung TRINITATIS

2 RAJA-RAJA 4 : 42 - 44                                              

LehononNa do na di ho, asal porsea ho!

Pamuhai dohot hatorangan

I.       Patujolo

Marragam do angka siadopan ni jolma di portibion, baik sian arsak nang las ni roha pe. Boasa pola ringkot adong sisongoni? Ala roha ni jolma i ndang manontong manghaposi Debata na jumadihon ngoluna, na manarihon sandok na ringkot dingoluna  jala na mangalehon hosa hangoluanna. Siala ni do umbahen na gabe marganti soring dibahen Debata angka na masa na di tano on, asa adong na gabe sipaingot di jolma i, asa nian jumpang pangarajumion didirina nang maradophon donganna jolma. Angka na masa i do na gabe dalan ni Debata patandahon huasoNa maradophon jolma i.

Namangihut muse, molo disungkun muse tu halak Kristen: “Boasa porsea na boi do Debata mangaramoti hamu mamolus saluhut angka hamaolon? Alusna pasti marasingasing be. Alai molo tasungkun on tu si Elisa, alusna:”sian na robi pe nunga dipatuduhon na diramoti Debata do angka naposoNa dohot bangsoNa, jala tontu, nang au pe ramotanNa do.” Laos on ma na pinangke ni si Elisa mangadopi hamaolon na masa haleon di Gilgal. Suang songoni ma, marsiajar ma hita sian na masa na niadopan ni si Elisa marhite turpuk jamita on.

II.    Hatorangan – Aplikasi

Ayat 42: Nunga sada hasomalan di halak Israel na mangalehon pelean sipanganon tu panurirangNa, asa ditangiangkon gabe na niulana, ala nang na nilehonna i pe sian hasil na niulana doi, laos ala masa haleon dihatiha i, ido umbahen na adong ro manarihon naposo ni Debata. Umbahen ido na gabe ro sian Baal Salisa mamboan sipanganon tu si Elisa {Elisa = Elisus (Bhs. Heber) na marlapatan Debata Sipalua. Si Elisa tarjou manggantihon si Elia manguduti ulaonna di harajaon Utara secara khusus laho mangadopi angka persoalan na masa ditonga-tonga ni masyarakat dohot angka raja (Ahab, Ahazkia, Joram, Jehu, Joahas dohot Jonas)}, ima roti hulu { Roti Hulu: 20 roti sagu-sagu (jelai) dohot eme (gandum) na baru ditapu dope.} Dijalo jala las do roha ni si Elisa manjalosa, huhut asa taruli nang angka na torop i. Umbahen ido na gabe diparlehon tu na torop i. Alai, ianggo na binaritahonna di turpuk on, ima halak na so olo mangalehon peleanna tu panurirang pargagpgap (panurirang na pinabangkit ni raja Jerobeam (1 Raja-raja 12:28-31). Tu angka “naposo ni Debata” na sintong do (Patudos tu ay. 8 – 9).   

Sada hasolmalan na denggan do sasintongna molo ro hita mamboan angka pelean na denggan jala tama tu joro ni Tuhan i, ai nang ido hape dalan laho mangido asi ni roha ni Debata laho umpasupasuhon angka saluhut na taula. Asa lam denggan angka na tajalo sian adopan ni Debata. Laos ihut tu si, taida ma roha ni na mangalehon sipanganon i, ringkot di rohana naeng mangalehon pangurupion. On ma sada sikap sitiruon ta, na sintong marnida angka persoalan na masa dinahumaliang hita. Ai roha na manarihon huhut mangalehon pangurupion i do na nihalashon ni Debata. Ai taida ma, ndang holan si Elisa be na taruli, alai nunga gabe dohot angka situan na torop.

Ayat 43: Ragu do angka naposo ni si Elisa mambagihon roti hulu i tu angka situannatorop i, ai molo sian etongetongna, ndang boi sae manang ganup saluhutna. Ai molo so sae dibagibagihon, boi do gabe pa ro masalah na imbaru, boi do tubu pangiburuon, tubu muse late ni roha na mambahen parbadaan sama nasida (songon hasomalan dihita batak, godang dope ndang sadar didirina manjalo sijaloonna. Godang do halak na gabe pogos molo dung adong sibagion). Alai, dibagasan roha na lambok do si Elisa mangalusi naposona i, ai diboto ibana ndang na dirina dipangasahon ibana, alai Debata do. Siala ni ido umbahen na gabe didok:”ai songon on do hata ni Jahowa: Ingkon mangan angka jolma i jala ingkon adong dope teba.” Dison ma tanda mujijat na  masa pinatuduhon ni si Elisa. Ai nang jolma ipe sai tongtong do disarihon Debata ditingki hahurangan.

Nang hita jolma pe, sai jotjot do jumpang dihita hagangguon (keraguan) di hata ni Debata, ala sai dirinta sandiri do na tahaposi, sai holan gogonta na tapangasahon, molo nga Debata namandok, tung so tupa be sundat saluhutna i. Ringkot muse ingotonta, ndang laos boti hape roha ni Debata mida angka na masa diparngoluan ni jolma i. Ditingki hahurangan, dilehon Debata do angka na denggan i mambahen asa mangolu jala marhasonangan hita jolma (bnd. Psalmen 33:18; Ida ma, sai nolnol do mata ni Jahowa tu angka na mangkabiari Ibana, angka na mangkalungunhon asi ni rohana.  Psalmen 34:16:”Sai manatap do mata ni Jahowa tu angka partigor, jala pinggolna tu angguknasida.”  Godang do dalan ni Debata manarihon ngolu ni jolmai, ndada holan si Elisa, hita saluhutna pe boi do na gabe parhitean ni Debata mamasumasu donganta jolma na dibagasan hahurangan. Ai ingkon rajumanta do, dipangke Debata do ngolunta on na gabe ulaulaNa, tu halak na asing pe.

Ayat 44: Gabe sintong saluhut na binahen ni Debata di roha ni na olo porsea di hataNa. Ndang adong be na hurang jala molo tung dibagasan hasusaan hian, sai na dipatupa Debata do angka si las ni roha di tingki naung tinontuhon ni Debata. Ai halak na manghaposi Debata do na dapotan jala maruli pasupasu. Jala ndang intap ni i, lobi sian na tahirim manang na tapangido ingkon do “TEBA” (kasih Tuhan itu berlimpah). Siala ni taingot ma:

1. Psalmen 37:5” Pasahat ma dalanmu tu Jahowa jala haposi Ibana, asa Ibana paturehon
2. Filipi  4:6”Unang holsohon hamu agia aha; alai sandok pabotohon hamu ma tu Debata pangidoanmuna marhitehite tangiang dohot elehelek mardongan mauliate! 
3. Bibel (Alkitab) tung mansai tangkas jala sintong do i. Nunga dipatuduhon Debata na parduli do Ibana jala na tau do Ibana mangaramoti bangsoNa salelenglelengna. Sasintongna ingkon adong ma nian di hita haporseaon, songon haporseaon ni si Elisa di na mangadopi godang ni ancaman jala hamaolon na manghaliangi hita, jala haporseaon i do na gabe ondolan ni pambahenanta. 
4.  Ungkap hamu ma rohamu maradophon Debata songon pambahenan ni sahalak na ro sian Baal-Salisa, dungi ungkapon ni Debata ma rohamu maradophon na humaliang hamu. Halak na ungkap rohana tu Debata, tarida doi sian haungkaponna maradophon donganna jolma.