Bahan Jamita, 19 Juli 2015; Minggu 7 Dung TRINITATIS

Diboto Jesus do na rumingkot di hamu, jala dilehon doi ala asi ni rohaNa

Pamuhai dohot hatorangan

Marragam do ulaon ta di portibi on, ai nang asi ni roha (karunia) i pe marimbar do i di ganup jolma (Joh. 1 : 16; Ul. Ap. 21 : 9; Rom 1 : 5; 1 Korint 7 : 7; 1 Korint 12 : 9 – 11). Alai sandok i, na san a taula, saluhut tu Debata doi tapertanggung jawabhon. Ai tu sandok hita do dipasahat ulaon i, ai nang huaso i pe sian mulana nunga dipasahat Debata tu jolma i, ima na mangarajai saluhut na tinompa ni Debata ( 1 Musa 1 : 28 – 30). On ma tanda na na ingkon mangula (kerja) do jolma i diportibion, ai sian ulaon i do nang hita dapotan asi ni roha (Parjamita 2 : 25; 3:13; 5:17). Sian angka na mangula ulaon i, torop do halak na mandok “NUNGA LOJA”, “NDANG MAR NA SAE”, jala “AHA DO PE”…Sian i, taida ma…molo daging i hape sai na loja doi, sai na hurang doi, jala ndang mar na sae saleleng so sondot do pe ngolunta. Ndang adong hasonganan nang paradianan na sonang saleleng di portibi on, holan sogot di banua ginjang do jumpang hasonangan. Siala ni halojaon i, ringkot do mangulon nang daging sian ulaon i.

Taida ma songon sisean ni Tuhan Jesus, naung loja sian ulaon na sinuru ni guruNa, ima laho marjamita dohot mangajari (ay. 7). Dung simpul ulaon i, marpungu nasida rap dohot angka donganna tarlumobi dohot Jesus na gabe pamusatan ni parpunguan nasida, jala tu Jesus do dipabotohon saluhut angka naung diulahon nasida. Sian on taida ma saluhut angka na mangula ingkon pabotohon na niulana tu Tuhan Jesus. Tarlumobi angka parhobas di huria i, pabotohon jala bertanggungjawab tu Jesus i sandiri (Heber 13 : 17-“Tangihon hamu ma angka na manguluhon hamu jala oloi hamu ma nasida! Ai nasida do manjagai tondimuna, laos nasida do maralus sogot; naeng ma marlas ni roha nasida disi, unang mardongan hoihoi, ai ndang ulimuna i.) Saluhut angka parhobas (pelayan) ingkon gabe sonang rohana molo saluhut panghobasionna dipahimpun tu Kristus. Nang songon dia angka pajanghonon manang panjaloon ni sandok jolma ingkon pabotohonon na tu Jesus. Ai disi dipabotohon, disi do nang roha ni Tuhan i laho mangalusi hita. Ai diboto Ibana do saluhut na ringkot di hita. Ay. 31: disuru nasida maradi (pahosahon saotik). Jala sian angka pandohan ni siseanNa i, diboto Ibana do manang songon dia lojana jala songon dia angka holso ni rohana, tarlumobi ma muse dung di boto nasida barita ni si Johannes Pandidi naung pinamate ni raja Herodes. Diboto Jesus do na gabe inganan di nasida mambahen mulak gogo jala malua sian biar ni roha, dilehon tingki mangalap gogo (patudos: Pangungkapon 4 :8). Jadi na ringkot di daging i pe hape diboto Tuhan i do, nang na dipingkiran. Ringkot do maradi daging nang pingkiran i sian hasosahan ni parngoluan na di portibi on. Jala nasida angka na olo maradi, dapot hasonagan, las ni roha. Ai parpodom ni halak na mangula, sonang do. Alai ndang torus nasida maradi sian ulaonna, holan satongkin do.

Sumurut ma nasida satongkin marhite parau (ay. 32), alai ianggo halak na sailaon mangihut tu nasida, diboto do manang na tu dia nasida naeng maporus. Umbahen ido sai diihuthon na torop i do nasida, nang loja mardalan sian dalan darat. Jala jumpang nasida do angka sisean i dohot Jesus. Nian molo sian naung masa i, tung mansai loja do Jesus dohot siseanNa dibahen angka na torop, godang jut ni roha dibahen, alai ndang muruk Tuhan Jesus tu nasida nang sai mangihut nasida, alai gabe baliksa do, dijanghon do nasida jala dilehon marsipanganon. Na taida sian on diangka siihuthon Kristus i: Godang do nian angka na sala tabahen maradophon Jesus i, alai hatop doi salpu sian roha ni Kristus. Ai diihuthon nasida do Jesus, ala ni roha ni nasida sandiri, ndang na dijou manang dipapungupungu. Ndang adong partingkian na diririt, ndang adong giringgiring na dipalu, alai sai ro do nasida mangihuthon Jesus. Nang mardalan pat, sai diiuhuthon nasida. Ndang pola holan ulaonna na sai diharingkothon, ai ditadinghon nasida do ulaonna siganup ari, holan asa ditangihon nasida hata ni Tuhan Jesus. Sai songon na so parduli do nian Jesus tu nasida, alai sai ro do nasida tu Jesus, bahkan marlojong do nasida, asa jumolo nasida sahat sian Jesus dohot siseanNa. Uli na i molo jumpang dope sisongoni ni nuaeng dipartingkian on. Adong do pen a rot u Jesus ala ni roha na sandiri? Manang ala ni hasomalan, ala ni tondong, dongan dohot angka na ringkot? Ai taida ma roha ni nasida naeng pajumpang dohot Jesus, loja marlojong, ditadinghon ulaonna, jala sai diihutihut do Jesus. Boha do nuaeng haroronta tu Jesus (gareja), ala ni aha do umbahen na ro hita tu Ibana (gareja)?  Alai molo taida do masa nuaeng on, nga tung mansai maol be jumpang roha na sisongoni. Ndang piga be na sintong mangihuthon Jesus, jala ndang hataNa i be na tinangihonna di huria i, hata ni halak na ma. Suang songoni, nang angka na so parduli be tu huria i nuaeng, sai maos do giringgiring manghuling manjouhon, di gora jala ditogihon do, diida do nang angka donganna na rot u Jesus i, alai ndang parduli be di si…sada si dohonon sian i: NDANG JESUS NA RUMINGKOT DI NASIDA, NGOLUNA SANDIRI do. Hape ndang diboto hita, ngolunta i sandiri pe SIAN IBANA do, jala IBANA NA SUMARIHONSA. Boasa didok songoni? Dung di ida Tuhan Jesus angka na ro, tubu do asi ni rohaNa, ai diida Ibana angka na torop i songon na so “PINARMAHAN”, ndang adong na manguluhon jala na mangajari nasida. Sian asi roha ni Kristus i, dipamalum do nasida jala diajarhon tu nasida hasintongan i. Saluhut na ro i dibahen Ibana do tudos tu TAMUE Na jala dilehon do tu nasida ragam ni pangapulion na manorus tu roha. Nang pe sai digogohon siseanNa i paulahonNa nasida, alai ianggo Jesus disarihon do nasida. Dilehon do na torop mangan, pola sahat tu na bosuran. Songoni ni ma dipatupa Jesus i na patuduhon tu sandok jolma i asi ni rohana, jala haluaon na pinaradena di angka na olo rot u Jesus. Ndang holan “SIPANGANON” pardagingon na sinarihon ni Jesus, alai ndang “SIPANGANON” partondion di lehon do. Asa sai Ibana ma nian na tongtong manggohi angka “aek” di na mauas, jala sipanganon di angka na male saleleng nasida mangeahi Jesus jala na sai paihutihut Ibana (Psalm 84 : 7 – 8). Pangaramotion ni Debata ndang siunjunan, alai ingkon sihaporseaon do na ingon sahat ditingkina, jala saleleng on pen dang hea do pe benda (mengecewakan) di angka na olo ro manghobasi ulaon ni Tuhan  i diportibi on, alai dilehon do sombu ni uas marhite sian pangurupion na ro ditingkina, jala na tung mansai ringkot di jolma i. JAHOWA JIREH: diparade  Debata, tu angka na paimahon Debata. Tingki sahat nasida tu Genesaret, dijanghon na torop do Jesus, ai nunga tung mansai tanda nasida di Jesus, nunga diboto angka na niulaNa, Ibana silehon hahipason na so marnida tingki nang inganan. Diboan nasida angka na marsahit, ndang dirohaon nasida be ari na ngali, loja nang partingkian na ringkot di nasida, asal ma jumpang nasida Jesus, jala jumpang hamamalum. Sian na masa on, tiada: Hatop do ditanda nasida Jesus jala dihaporsea i ala ni ulaonNa jala parjamitaanNa, boha hita nunga tatanda Jesus, jala marhite aha do partinandaan tat u Jesus?. Lan muse taida ma dos ni roha ni nasida, marsiurupan mamboan angka namarsahit, asa jumpang hamamalum di angka donganna. Boha hita, rade do hita mangurupi angka dongannta, asa jumpang hamamalum, manang manambai na hancit ni donganta do hita? Marsiurupan ma hita mamboan angka dongannta tu Jesus. Marsiurupan ma hita mambahen na “SEHAT” tu donganta ”unang ma na hancit…hancit ni roha”.