Hamuliatehon hamu ma panjaloon di asi ni roha ni
Debata
PATUJOLO
Saluhut do
hita porsea, ganup halak na porsea ingkon dapotan ai ni roha dohot haluaon.
Alai, ala ni ragam ni si adopan di portibion, mambahen gabe mardosa nang
nasida, gabe ditadinghon jolma i nang haporseaonna dohot hangoluanna naung
dibagasan barita nauli (injil). Siala ni ido saluhut na jolma on, ingkon
diarahon asa nian dipasada/dipadame dohot Debata jala manjalo asi ni rohaNa ( 2
Korint 5 : 20). Ganup halak naung manjalo asi ni roha i, ingkon diarahon unang
maninggalhon, manang ingkon manghamuliatehon marhite parange na denggan
taringot tu asi ni roha naung jinalona (patudos: 2 Korint 6 : 14 – 18). Antong,
angka dia do na mambahen jolma i gabe maninggalhon haporseaonna, manang dia do
na mambahen gabe magopo asi ni roha naung jinalona?
HATORANGAN
Ap. Paulus
mansai marungkil situtu mangadopi na masa di huria na Korint. Sada huria na
hinaholonganna, huria naung magodang di haporseaon, alai gabe muba di laon-laon
ni ari siala ni angka pangajarion na rot u Korint. Laos marudut ma muse, godang
ni hata-hata taringot tu si Paulus, na mandok ndang tutu holong ni roha ni
Apostel i tu nasida, jala didok do ibana apostel palsu. Siala ni ido, godang
angka sian halak “Kristen” di Korint, gabe godang mangihut di ajaran na imbaru
na ro tu nasida. Tanpa seleksi, torop nasida manjanghon pangajarion i. Ndang
adong be tubu asi ni roha. Namora ndang papisatpisat na pogos, pejabat ndang
mangulahon keadilan, tarlumobi masalah moral nunga be ndang dipersoalhon
nasida. Jadi hinorhon ni masa on, gabe
godang jolma i manghalupahon asi ni roha ni Debata naung jinalona hian,
termasuk ma i di angka pangula (pelayan) na adong di Korint. Turpuk on dipukka
marhite hata sosososo, hata na mangapoi, manang hata na paingothon, astuanna:
asa unang lupa. Boasa songoni? Marnida do Paulus di sandok na masa di Korint.
Hinorhon ni godang ni panosak, lomos do roha ni apostel gabe saluhut na nasida
muba, gabe dihalupahon nasida asi ni roha ni Debata. Umbahen ido gabe dipatudos
ibana tu dirina na mangadopi angka ragam ni na masa tu ibana holan laho
mangambati langkana mamaritahon barita nauli i. Alai dibagasan hata pos ni roha
na sai dipeop apostel i, ima pangurupion ni Debata tu sandok angka naposoNa
(ay. 2; patudos: Jes. 49 : 8). Angka dia ma na niadopan jala na niulahon nasida
manjagahon asi ni roha ni Debata naung jinalona ni ibana?
a.
Ndang mangalehon partuktuhan: (ay. 3) manang songon dia pe na masa sai dijagahon
nasida do hinarga ni tohonan na sahat di jalo ibana. Dipasiding nasida do angka
ulaon na boi bahenon ni jolma laho majorat nasida, mambahen nasida gabe sala,
na boi patutoru arga ni tohonan naung jinalo ni nasida. Artina, saluhut angka
ulaon na maralo tu tohonan i, sai dipasiding nasida. Tung maol situtu doi nian,
alai ido na sai dilahon apostel i, marhite pos ni roha na parjolo i na mandok: ditingki parasian do ho
hutangihon….d.u.
b.
Ingkon tubu habengeton godang, jala on ma sinjata na laho mangadopi angka ragam ni
hamaolon i.
On ma ragam na niadopan ni apostel laos on ma na
niulahonna patuduhon hasintongan ni hata ni ni Debata: Hona pukkul, tarhurung,
hagunturon, halojaon, di mangkar ni mata, di parpuasaon; di bagasan hatomanon, di bagasan parbinotoan,
lambas ni roha dohot habasaron, di bagasan Tondi Parbadia, di bagasan holong ni
roha na so marpangansi; di bagasan hata hasintongan, di bagasan hagogoon ni
Debata, marhitehite sinjata hatigoran di siamun dohot hambirang; mamolus sian
hasangapon dohot haleaon, sian barita na roa dohot barita na denggan; songon
angka na mangaliluhon, hape parsintong do; songon angka na so tinanda, hape na
tinanda do; songon na naeng mate, hape na mangolu; songon angka na binunu, alai
ndada na mate; songon angka na marsak, alai tongtong do parroha na las; songon
angka na pogos, alai torop do dipamora; songon na so paradongan, hape saluhut
do digomgom.
Boasa dipatolhas apostel i on? On ma mangalehon sada
gombaran ni angka na mangula di ulaon parbarita nauli. Ai marragam do na naeng
mangarongom nasida, marragam do dalan ni portibi on laho mangambati hasasahat
ni barita nauli, on do halomoan ni sibolis i.
Ay. 11: Dipatuduhon Ap. Paulus do manang songon dia holong
ni rohana tu nasida, ndang mamparsadi, alai tung saluhut do nasa na dirohana
hombar tu haluaon na pinarade ni Tuhan Jesus, di patolhas tu nasida, asa si
sada arta nasida di banua ginjang. Nang pe diboto ibana manang songon dia roha
ni huria di Korint maradophon nasida, na gabe hurang panjanghonon ni nasida tu
parbaritaan ni apostel. Alai, ndang mandao ianggo apostel i, alai lam dipajonok
do dirina, jala na gabe ama ibana maradophon huria i, na manghaholongi huria i
songon ANAK di ibana. Sada hata na tung mansai lambok jala gok holong: Palambas
hamu ma nang rohamuna, balos ni i! (Bukalah hati kamu
selebar-lebarnya!)
Aplikasi –
Siboanon tu jamita
1.
Godang do
halak muba…muba sian na denggan gabe tu na roa, nang baliksa. Muba sian
hatoguon ni roha, gabe parroha na gale. Lan angka na asing, dohot ma i nang
muba di panghaporseaon nang panghirimon taringot tu holong ni roha ni Debata.
Boi doi masa ala ni pengaruh ni lingkungan na so denggan. Alai di halak Kristen
naung porsea di Tuhan i, songon di jamita minggu 7 Juni, di dok: Jolo porsea do
asa marhatahata! Artina: halak naung porsea do boi manahan di saluhut na masa
di portibi on, jala gabe boi manghatindanghonsa.
2.
Sada do dipeop
apostel Paulus taringot tu ulaonna: sai na urupan ni Tuhan i do ibana mangula
ulaonna…ai ditangihon do ibana di ganup ari. Hit ape nang songoni do:
ditangihon do hita ganup tingki. Alai na gabe sungkunsungkun, adong do tadok tu
Debata, manang adong do tapabotohon tu Debata? Antong pabotohon ma tu Debata,
ai alusan ni Debata do hita.
3.
Borat situtu
do di roha ni na gale i taringot tu ulaon ni huria i. Hinorhon ni ragam ni na
masa na sai manosak, hinorhon ni haringkotan ni ngolu pardagingon on, jala
ringkot ni na mangalului 3 H. Alai asing do prinsip ni ap. Paulus…ngoluna na i
tudos doi songon gunci…inganan ni arta na arga situtu. Ise do na mangisi gunci
i? Debata do. Boha asa di isi i? Ulahon ma ulaonNa, marhite parbaritaan,
panghatindangion…jempekna dohonon: Debata do manarihon sandok gulmit ni ngolum…
4.
TU angka
partohonan: tajagahon ma hinarga ni tohonan naung ta jalo. Tapamanat ma nang
ulaonta, asa unang partuktuhan i maradophon torop halak, na mambahen hita gabe so
mararga ala ulaon na manirpang sian tohonan i sandiri. Antong, asa tapajamot
dirinta, unang tartuktuk hita ala ni ulaonta.
5.
Tu angka ruas
pe, ingkon na hot do manjagahon habadiaonna di dirina nang ulaonna. Saluhut
halak Kristen tarjaou do na gabe sitindangi ni Debata. Parange ido na patuduhon
hita na sisean ni Kristus i, jala parange ido na patuduhon haporseaon huhut
gabe tiruan ma hita maradopon humaliang hita.
6.
Tona ni ap.
Paulus: palambas hamu ma rohamuna! Ta palambas ma rohanta manjanghon
hasintongan ni Debata, nang songon dia pe hinamaol i, sai tatiru ma Apostel, na
manontong maniop, manjagahon haporseaonna. Ndang boi ibana sumurut nang ragam
ni angka na naeng mangago ibana. Saluhut na i diadopi ibana mardongan pos ni
roha di Tuhan i: Tangihononku do ho…
Antong, tahamuliatehon ma
asi ni roha naung ta jalo sian Tuhan i,
Tidak ada komentar:
Posting Komentar