Jamita Minggu, 14 Juni 2015: Hesekiel 17 : 22 - 24

Sonang situtu do angka na marlinggom tu Debata

Patujolo

Jerusalem nunga gabe sada huta na gok pangarupaon (kekerasan) jala nunga gabe lam tarida angka parange halumlamon. Ndang adong be disi angka na marsipasangapan, ndang jumpang be habadiaon. Ndang adong be “adat” (masalah moral) di nasida, suap, korupsi nunga gabe ulaon hasomalon be. Boasa boi masa na songoni? Ala naung ditinggalhon nasida Debata dohot HataNa. Siala ni ido ingkon uhumon do bangso i, asa tung muba roha ni nasida, jala mulak muse tu Debata. Panurirang Hesekiel tarjou laho patolhashon Hata ni Debata tu bangso i dohot tu Raja Sedekia (raja na so manghabiari Debata, raja na berhianat tu raja Babel jala mangoloi raja Misir). Siala ni pengkhianatan ni raja i do umbahen na gabe ro raja Nebukadnezar (raja Babel), mangaloha Juda. Boasa songoni, sian mula nunga marjanji ibana jala mamangke goar ni Debata tu raja Babel, ingkon satia ibana tu raja Babel. Siala pandohan on, ndang adong be roha ni raja Babel laho mangaloha (menghancurkan) Juda, alai nunga gabe dihalupahon raja Sedekia i, gabe munggil rohana, laos dioloi raja Misir. Muruk Debata tu raja Sedikia nang dohot tu bangso i. Jadi dosa na umbalga na ni ulahon ni raja Sedekia ima, ndang arga be di ibana goar ni Debata jala ndang diparbadia i ibana be Goar ni Debata (tajaha: 2 Raj.24:18 - 25:21 dan 2 Taw.36:11-21).

Hatorangan Ni Turpuk

Taboto do manang songon dia holong ni roha ni Debata di bangsoNai. Na hea mansadi pambahenanNa tu bangso Isarel. Alai ndang adong di nasida roha na menghargai pambahenan ni Debata, tarida sian naung ditundalhon nasida Debata, ndang hombar tu lomo manang tu sangkap ni Debata be nasida mangolu. Ngolu ni nasida, nunga be ngolu na manegai, ngolu na marsileaan jala na so adong be roha marsihaholongon. Suang songoni ni angka raja (uluan), nunga be sal peak di huaso na adong di ibana. Pangarupaon na ma na sai jotjot sahat tu angka na dangol marparniahapan, jala ndang di rohaon be angka na so marama so marina. Siala ni namasa on ma, uhum ni Debata ingkon dijalo nasida, jala ala ni dosa ni nasida sandiri do uhum gabe sahat tu nasida. Alai, sai hot do pe holong di roha ni Debata. Umbalga do holongNa sian rimasNa. Ndang adong roha “pamatehon” alai roha “pangoluhon” di angka saluhut pambahenan ni Debata (bnd. Hesekiel 33 : 11). Nunga di uhum Debata bangsoNa i, alai ingkon Ibana sandiri do nang paulihon i. Ai naeng do gabe tigor jala sintong muse mulak bangso i tu dalan lomo ni roha ni Debata, asa unang mate nasida, alai asa dapotan hangoluan nasida ro di saluhut pinompar ni nasida ( 1 Musa 26 : 3; Psalm 69 : 36; Psalm 112:2). Gombaran patuduhon huaso nang holong ni roha ni Debata tu bangso i, marhite hau ares na timbo (manggombarhon Babel na timbo, marhuaso jala na so adong tudosan). Debata mambuat sada ranting sian pusuk, marlapatan doi nunga mangula Debata di sandok na niadopan ni Israel, ndang marhoaso jala ndang margogo be Babel ianggo tu nasida, jala disuanton muse tu dolok na timbo, asa diida sando tano on (bnd. Jes. 2 :2; 11: 10; Jes. 53:2). Lapatanna: ingkon sandok tano on marnida pambahenan ni Debata, ai nag ok holong ni roha do Ibana jala Ibana do na tau mangalehon haluaon tu sandok jolma nang tano on. Boi ma on tarida sian hamumulak/haluaon ni bangso Isarel sian Babel taon 538. Mardangka na sinuan ni Debata, jala timbo; Jerusalem do i na nidok ni Debata, Jerusalem na songkal jala balga situtu. Hinorhon ni hinabalga na, gabe tu Ibana ma sandok jolma nang tano on marlinggom, jala sonang do saluhut angka na mian dibagasan Ibana. Sian pomparan ni Israel i sandiri na gabe bangkit raja bolon sigomgomi sandok tano on (Jes. 11:1; Jer. 23:5; 33:15; Hes. 17:23). Sandok gombaron on, sandok na masa i, pabotohon tu sandok bangso i do, asa diida nasida, jala dihatindanghon tu sandok angka bangso na adong di tano on. Aha ma ringkot botoon ni sandok tano on?

Siboanon tu Jamita

1.       Sahalak Raja na sintong marpangalaho, raja na biar mida Debata, ingkon gabe bangso na makmur, sonang jala dame do nang bangso na niuluhonna (incorporate personality)

2.       Halak na mangasahon goar ni Tuhan i, unang be di jua  na sintong do marhuaso Goar ni Tuhan. Unang be gabe munggil roha ni angka naung marhaposan di huaso ni Tuhan i, songon raha Sedekia, na so dihaposi ibana be huaso ni Tuhan i.

3.       Tarrimas do Debata tu sude jolma on, molo mardosa, molo ditundalhon nasida Debata, jala ndang dihaposi be Debata. Alai siingotonta, uhum holong ni roha do na binahen ni Debata. Ndang uhum hamatean, alai uhum hangoluan. Di uhum Debata jolma i, holan asa diingot jolma i, diboto  jolma, naung sala ibana disandok dalanna, jala mulak ma nian tumundalhonsa.

4.       Diharingkothon rohanta do pe Debata? (apakah kita masih butuh Tuhan?). Alai taida ma sian panuanon ni Debata di hau na timbo jala na lomak situtu. Saluhut do nasa pangisi ni tano on marsigantung tu Ibana, jala mian sonang di Ibana. Antong, ndang adong alas an ni jolmaon mandok, ndang porlu di hami Debata. Sadar manang ndang sadar hita, ringkot do Debata di hita (kita perlu Tuhan, dan tidak akan pernah tidak butuh Tuhan)

5.       Boasa ringkot di hita Debata? Ala Debata do na marhuaso di atas ni saluhut. Ndang adong huaso na asing na gumogo, na sumintong, holan so huaso ni Debata. Debata do na mangalehon sandok na sa na adong di tano on. Nang huaso ni jolma i pe, na sian Debata sandiri doi.

6.       Tau do Debata manogu halak na tinggang, jala tau do Debata margogoihon halak na gale, jala tau do Debata mangapuli angka na marsak roha. Tu ise do hata “tau” i? Ima tu halak angka na ro marlinggom tu holong dohot asi ni roha ni Debata.

7.       Dibagasan Tuhan i, sandok hasonangan do, ndang adong hasusaan di si.

8.       Antong patutoru ma dirim di adopan ni Debata, asa dipatimbo ho di tingkina