Jesaya 35 : 4 - 7a
“Debata
do Sipalua di hita”
Patujolo
Godang
do angka na so taantusi saluhut na masa na di portibion, ai jotjot suhar sian
na taboto, tahirim jala taantusi. Suang songoni nang panghorhon ni na masa i,
mambahen jolma i gabe jotjot adong dibagasan hasusaan nang songoni las ni roha.
Alai maruju do saluhutna i. Boasa songoni? Ai naung gok dosa do portibion, jala
ndang ulaon lomo ni roha ni Debata be na dihangoluhon jala diulahon. Hinorhon
ni hagogon ni sibolis na sai manoropi roha ni jolma i, gabe ido mambahen jolma
i naeng mangalo, mangalo jala manundalhon Debata. Tarida ma i sian angka
parange ni jolma i sian na jolo sahat rodi tingki on na so apala parduli be di
Debata. Ndang adong be nuaeng jumolo mamingkirhon biar mida Jahowa asa mangula
ulaon na, mandok sidohononna, nunga jumolo halomoan ni rohana sandiri. Umbahen ido
gabe sai hira na hona uhum do hita ganup molo dung jumpang angka na suhar sian
rohanta, na so hombar tu lomo ni rohanta. Alai, ndada holan na sian dirinta
sandiri haroro ni angka pangunjunan tu dirinta. Torop do nang halak na asing na
gabe pa ro jut roha, mambahen hita gabe dohot mardosa. Diboto Debata do i na
masa i dingolu ni jolma i. Umbahen ido na gabe dipasahat Debata bagabagaNa tu
sandok jolma ma na dibagasan hasusaan ala ni portibi on. Taida ma aha ma nanaenf patupaon
jala bahenon ni Debata tu hita!
Hatorangan
Ayat
4: Nunga
bagas diida bangso Israel
manang na songon dia do pambahenan ni Debata di angka na mangalo patikNa. Jala
nunga lam marrongomon angka ragam ni hasusaan siala ni pangalaho ni portibion.
On ma na patuduhon na sintong do uhum ni Debata jala Ibana ingkon manguhum
portibi on, ndang margaitgait Debata di angka pandohanNa. Alai didok pe songoni
asa jumpang do angka hamubaon ni roha ni jolma, asa marhangoluan na imbaru.
Laos sian on boi do idaonta manang songon dia di pangampinan ni Debata di jolma
i. Umbahen ido, diangka jolma na tahutan jala na jumpang holso ni roha, di dok:
pir ma tondimuna, unang hamu mabiar! Aha do lapatan ni pandohan i? On ma tingki halehetanna panurirang
i pasahathon tona ni Debata tu bangso Israel, asa pasahaton ni panurirang i ma
sada barita las ni roha na adong di habuangan Babel. Jala Tuhan i sandiri do na
mambahen manjadi saluhutna. Alai adong do na pinangido ni Debata tu bangsoNa,
ima haporseaon na togu, unang mabiar jala bobonosan (Jes. 30:15; 28:16). Tuhan
i ma na gabe “alo” ni musu ni bangso i, jala Debata sandiri na
mambaloshon angka hajahaton ni nasida. Debata sandiri mandok: Apuli, apuli hamu bangsongki, ninna
Debatamuna.Hata apulapul ma dok hamu tu roha ni isi ni Jerusalem, jala jouhon
hamu ma tu nasida: Nunga marujung parungkilonna, ai nunga salese dosana i, ai
nunga dijalo sian tangan ni Jahowa silompit dua singkat ni saluhut dosana
(Jes. 40:1-2). Ingkon gabe adong jumpang panhirimon na
mangolu di jolma i na ingkon jumpang angka las ni roha, hahipason, hadamean,
parhusor ni ngolungolu ni jolma, lan na asing nari. Angka dia ma silas ni roha
siidaon ni sandok jolma on sogot di tanda haholongan ni Debata?
Ay.
5 – 7: On ma barita na
uli na pinatolhas ni panurirang i di ngolu naeng ro di angka halak na porsea,
barita na mambahen las roha, panghirimon jala halalas ni roha/parolopolopon. Ai
nunga tangkas dipabotohon, hata na mandok:”di si” (pada waktu itu = bhs.
Indonesia), ima pabotohon tingki haroro ni Tuhan laho paluahon bangso-Na. Dia
ma rumangna? Ima angka parsahiton na so boi be tarpamalum (sakit permanen),
didok disi angka na: mata ni halak na mapitung gabe buha, jala marbinege
bahenonna pinggol ni angka na nengel. On ma gombaran ni halak na so margolle,
na holan manghirim di pangurupion di halak na ma ianggo parngoluonna. Alai di
hororo ni Tuhan i, na gabe Mesias Ibana, jumpang ma hamamalumna, ai naung
tardok doi ari parolopolopon naung ro, laos on ma gombaran ni haluaon ni
hajolmaon ni jolma sian dosa. Marhajingjang
ma disi halak na pangpang songon ursa, jala mariaia dila ni halak na ngungu, ai
marbuhalbuhal ma angka aek di halongonan jala sunge di adaran. Jadi nasida pen dada holan dipalua manang
dipamalum alai didok sahat ro di na marlas ni roha (marhajingjang). Ai dison
tangkas jolmai dipaimbaru jala diparbadiai, ai gabe mulak ma jolma i muse na
gabe tumiru rupa ni TUHAN i (segambar dengan ALLAH). Ima
pambahenan na so boi tarpatupa jolma na gogo, na malo na sangap (holan Debata do na boi patupahon). Sian
pandohan i, tarida ma na balga situtu do pambahenan ni Debata tu jolma i, lobi
sian huaso na adong na di tano on, laos umbalga sian angka ragam ni uhum naung
dohot na naeng bahenon ni Debata tu portibi on. Ndanda holan pardagingon ni
jolma i nanaeng paluaonNa, alai dohot do nang angka inganan parmianan ni jolma
paulion ni Debata, asa unang jumpang be hahurangan di parngoluan ni jolma i.
Tano hasang gabe tao, tano bangkalbangkal gabe parmualan aek. Haroro ni
hangoluan do na nidok na dison. Dipataru
do tu jolma i dalan hangoluan asa marhaluaon sian angka hasosahan na diportibi
on (ayat 4c: Ho do ibana tongon paluahon hamu). On ma gombaran ni ngolu ni jolma i, naung marsik
(kering) gabe tano maraek, tano na so boi tubu manang aha gabe tano na napu, na
manggombarhon hangoluan na mulak denggan, sonang manang damai sejahtera.
Sipahusohusoron
1.
Taingot ma,
manghorhon do dosa i, jala panghohonna tu na mangae hahansitan di portibi on.
Ala ni dosa i do gabe di pa ro Tuhan i na gabe UHUM manang sipaingot tu jolma
i. Jadi tangkas do sungkunonta dirinta taringot tu angka na masa di hita, asa
tubu pangarajumion na manghorhon tu hadengganon.
2.
Uhum di Tuhan
i, manogihon jolma i tu hamubaon ni roha
3.
Alai ndang
taparsoada, halak na asing boi do pa ro angka arsak di hita, halak na mardosa i
na sai papusapusa halak na tigor i. Dison ma nuaeng tarida huaso ni Tuhan, na
manatap jala na umbege saringar ni soara ni ganup jolma na manjouhon Tuhan i.
Barita haluaon nuaeng dibaritahon tu hita, jala dipatangkas do tu hita manang
dia nanaeng sipamalumon ni Tuhan i.
4.
Sahit na so boi
be tarpamalu portibi on, pamalumon ni Tuhan i ma. Artina: ndang salelengna hita
marsitaonon di portibi on. Molo pe tung sai manggogo portibion mambahen hita
gabe mapitung, mangungu jala nengel, alai inggo Tuhan i pamalumonna do hita.
Nunga tanggkas dipabotohon, naingkon marhajinjang do hita sogot, jala dapotan
ngolu na imbaru.
Tidak ada komentar:
Posting Komentar