Jamita Minggu 1 dung trinitatis: 2 Korint. 4 : 13 - 5 : 1

Manghatahon, ala porsea!

Patujolo

Barita na masa dipartingkian na parpudi on, na sai ta paida-ida, tapabegebege ima masalah “PALSU”. Mulai sian hepeng palsu, boras palsu, izajah palsu, batu akik palsu, jala na jumotjot, JANJI PALSU ni angka par-KAMPANYE. Saluhut na masa i, holan ala mandapot pangomoan na mansai balga situtu. Pangomoan na mambahen harugian di halak na asing. Tarlumobi didok nangkin, angka JANJI PALSU KAMPANYE…naung jotjot mambahen hita gabe korban janji palsu, na mambahen hita gabe sengsara sandiri. Taihuthon na nidokna alai saluhutna pandohanna i holan asa boi do ibana hundul gabe pejabat. Alai, taida ma nuaeng on di huria i pe nunga be masa KEPALSUAN. Baik di angka parhobas nang di angka ruas. Ndang adong be na MARSITUTU…imitasi nama sude. Boasa didok songoni? Ala ta dok do hita porsea, alai ndang hombar hita songon halak na porsea. Ala halak na porsea, ingkon dipabotohon do na hinaporseaanna, jala ingkon dibaritahon huhut di ulahon hombar tu na hinaporseaanna. Songon barita sadarion na sian Ap. Paulus…ala porsea do ibana di Jesus, gabe di hatahon ibana Jesus jala ditiop gomos ndang munggil manang ala ni aha pen na gabe pangambati.

Hatorangan

Molo tajaha do 2 Korint 4 saluhutna, boi do taida semangat ni Ap. Paulus na so sumurut manghatahon hata ni Debata manang bersaksi taringot tu Tuhan Jesus naung gabe Tuhan Ibana jala Sipalua. Adong 2 na mambahen angka Saksi Ni Tuhan i ndang boi denggan mangulahon ulaonna (melaksanakan tugas panggilannya):

1.       Roha na naeng manjalo PUJIAN sian halak (POPULARITAS – PENCITRAAN)

Godang do na manghalomohon asa dipuji ibana, na gabe songon keuntungan  di portibion ala ni ulaon na parbarita nauli. Boi sajo do dimulai ndang songoni harohaonna, ias do rohana, alai di laonlaon ni ari gabe marlaok nang rohana. Halak na sisongoni, manabunihon hasintongan ni Hata ni Debata holan ala na manjagahon roha ni ruas, ai mabiar unang tarsinggung roha ni ruas, apalagi ruas “NA MORA” manang “RUAS NA BERPENGARUH di HURIA”. Paulus mandok i “licik”, na mamalsuhon Hata ni Debata (memalsukan Firman Tuhan;  menerapkan secara salah) holan ala ni popularitas, holan ala naeng godang pangomoanna. Alai godang do na marimba parnidaaan tu sasahalak jolma, sial ni i, na gabe patokan ni pandohan on, ingkon mulak tu hasintongan Hata ni Tuhan i do hita na mandok: sian parbue na i ma ida hamu haporseaon nasida.

2.       PANGARUPAON (penganiayaan). Pangarupaon boi mabahen magale roha ni jolma i. Boi mambahen mabiar mandok na sintong i, bahkan mundur sian panghobasion. Alai Paulus dang songon i. Hot do hasetiaonna, semangat na torus naeng manghobasi sahat tu ujung ni ngoluna. Boasa boi songoni: ala sintong do pangantusion ni ibana taringot tu Kristus i, jala dos do songon si Daud haporseaonna. Molo so adong do pangantusion na sintong taringot tu Kristus i jala ndang adong tondi panghaporseaon na manggogoihon laho mamaritahon Hata i, ndang tau ibana mangahtahon Hata i. Ai molo so adong pangantusionna sintong i, ndang leleng martahan di hasintongan i. Taida ma, godang do halak na bertobat na marsaksi luar biasa, jala na mambahen godang halak na asing gabe tertarik. Lao tusan tuson bersaksi, alai ndang sadia leleng gabe sumurut (mintop). Alai ala sintong do pangantusion ni Paulus taringot tu Kristus i (ay. 14), na mandok: halak na sintong porsea tu Jesus Kristus, jaloonna do tumpalna ima haheheon na marhasangapon. Panghirimon na sisongon on ma na mambahen Paulus gabe margogo laho mamaritahon barita nauli, nang pe mansai godang diadopi nasida ragam ni hamaolon la ni Kristus i. Ayat 15: Hagogoon ni panghatindangiaon ndada tarida holan sian angka tanda mujizat, songon hahipason (kesembuhan)palaohon tondi na hodar di bagasan goar ni Jesus Kristus, alai tongtong sian kesaksian hidup na satia dingoluna nang godang angka parsorionna, songon na didok Ap. Paulus di ayat. 8 – 11. Ayat 16, “dibahen i ndang marnaloja hami” (“kami tidak tawar hati’). Parjolo: Nang pe sian fisik (jasmani) nasida loja jala magale, ala ni angka parsorion dohot ulaon ni nasida, alai roha ni nasida (batin), ima jiwa dohot tondi nasida sai ganup ari do dipaimbaru. Paduahon: sude angka parsorion na niadopan ni nasida i neang doi jala parsatongkinan doi, jala muse hamaolon i gabe parohon hasangapon doi, hasangapon na manontong. Patoluhon: orientasi ni ngolu ni nasida ndang angka halhal haportibi on, ala banuaginjang na ma na sai dipapingkirpingkir nasida. Toho do tutu saleleng di portibi ongodang do hal haportibi on na ringot alai ingoton do rumingkot do hala banuaginjang di angka na porsea. Ai haringkotan ni portibi on parsatongkinan doi , alai na so tarida i ima surgo i ima na hot jala manontong.

APLIKASI- Siboanon tu jamita

1.       Godang do hita nuaeng naung marroha na palsu. Artina: ndang adong na bulus marroha, ias marroha jala sintong marpanghuling.

2.       Halak na marhaporseaon do hita? Alusta diuji marhite:

a. Semangatta na manghatindanghon na binahen ni Tuhan Jesus di bagasan ngolunta, nang sian panghataion, nang sian parulaon, manang sian sikap; parange. Psalm 66 : 16 – 20: halak na marsigogo mamaritahon manang aha na binahen ni Tuhan i dingoluna. Ala ni denggan ni basa ni Tuhan i, ndang mansadi ibana mamaritahonsa (bnd. Jer. 20 : 9).

b. Orientasi hidup. Tu dia do taboan arah ni ngolunta on? Arta do manang hamoraon, dll.

3.       boi dohonon godang jolma i maol mangulahon na denggan maradophon donganna nang maradophon Debata. Gabe jot-jot marpili di jolma i si haholonganna, manang marpili jolma laho marprsangapi angka donganna na asing. Ingkon na dos manang na diginjangna do parngoluanna asa didongani manang dihaholongi. Hape didok: parsatongkinan do saluhut na adong na ditano on, alai manontong do ianggo Jesus dingolu ni angka na porsea jala marpanghirimon na mangolu maradophon asi ni roha ni Tuhan i.

Antong, godang do haporsuhon na ta pa ro sandiri tu ngolunta, ndang ala ni dongan, alai jot-jot alani dirinta sandiri. Alai molo gabe marungkil pe hita ala ni sitaonon na ditanoon alai ala hasintongan i, didok Tuhan i do: Hasangapon do sogot siteanon ni na porsea na sumurung sian saluhut na sangap na di tano on. Manahan, manontong dibagasan haporseaon na polin nang godang masa haporsuhon i!