Bahan Jamita Minggu, 24 Juli 2016: 1 Musa 18 : 20 - 32

Ev. Psalmen 67 : 1 - 8

Tangiang Mangido Pasupasu tu sandok jolma"

Patujolo – Hatorangan

Psalm 67 on tu dos do songon Psalm 65 dohot 66, na manggorahon sangkap ni Debata ima:

1.       asa ditanda portibi on Ibana (ayat 2a)

2.       asa boi dipalua portibi on (ay 2b)

Debata mambahen asa ditanda portibi on Ibana, marhite:

1.       Ulaon panompaonNa

2.       ulaon pamillitionNa di si Abraham dohot pinomparna

3.       PanobusionNa (harurar, pardalanan ni padang pasir, hamumulakna sian parhatobanan)

4.       Sude ulaonNa on disurathon, asa saluhut jolma manjaha Bibel i

5.       Pambahenan ni Debata di ari na mangihut (masa depan) marhite bagabaga nang pangungkapon marhite MesiasNa.

Par-Psalm on patuduhon pambahenan ni Debata, ima: Na mangula (bertindak) marhite sian pangasionna dohot pasupasupasuNa; manondangi do bohiNa. Laos dipabotohon manang songon dia do roha ni jolma i di pambahenan ni Debata:

a.         mandok mauliate jala mamuji angka bangso-bangso (2x pandohan)

b.         sude marga (suku bangsa) marlas ni roha

c.         marsuraksurak sogot angka bangso

Ayat 1: Psalmen on manaringoti taringot tu sangkap ni Debata tu bangsa-Na ditingki panjouon-Na di si Abraham (1 Musa 12 : 1-3, bnd. 4 Musa 6:24). Nang sada tangiang na manghilalahon panobusion saluhut jolma (penebusan universal). Dipangidohon Debata (YHWH) do saluhut angka jolma na tinompa na itu dos tu rupa nang pangalahoNa, mulak ma tu parsaoran rap dohot Debata dung madabu jolma tu bagasan dosa. Dipadenggan Debata hubunganNa dohot jolma tarida sian angka bagabagaNa sian na jolo i sahat ro di bagasan ombas on. Ay. 2: “HITA”, ise do “hita” dison? Godang do mandok on ima bangso Isarel (Psalm 4:6), alai taida ma tudutuduna tu :  Angka bangso (3,4b, 5a); sude angka marga (suku, ay. 4a); sude marga na adong di tano on (ay. 4c); sandok ujung ni tano on (ay. 7b). Dihalomohon Debata ima haluaon ni sandok bangso (Joh 3:16-17; 4:42, Ul. Ap. 2:17; 1 Tim 2:4; 4:10; Titus 2:11; 2 Pet3:9; 1 Joh 2:1-2; 4:9-10). "Sai marsinondang ma bohim mandongani hita": Hata pasupasu taringot tu haroro nang parsaoran ni Debata (secara pribadi; 4 Musa 6:22-27; laos ala denggan ni pandohan nang panghirimon on, jotjot do hata on dipatubegehon - Psalm 4:6; 31:16,80:3,7,19, 119:135). Nang pandohan on pe sai jotjot do marsaringar ditingki manimpuli di parpunguan di partangiangan si ganup ari Minggu, dihorong ni tangiang pasupasu na sian Pandita. Jala pandohan on pe sai dipasahat malim ni Israel (4 Musa 6:24-26). Adong tolu horang ni hata pasupasu on: ima: 1. Pangaramotion (perlindungan), asi ni roha (kasih karunia) dohot dame (damai sejahtera). Pasupasu sisongon do na sai diparbaga nanh dihirim bangso Israel . Alai asing do par-Psalmen, ndang holan manjalo pasupasu i holan tu dirina sambing, alai dipangidohon tu sandok bangso i. Ai didok rohana, pasupasu ni Debata ndang adong batasna, jala ingkon mabaor tu sude jolma asa tung saluhut portibi on tumanda Ibana. Jadi, manangiangkon jolma tung mansai godang haringkotanna, ndang holan asa tarpasupasu ngoluna alai dao andul sian i muse, asa lam ditanda angka jolmai Debata. Hata “SELA”, Perhatikan istilah ini ditempatkan di pinggir, tampaknya untuk si pemimpin paduan suara, di Maz 3:2,4,8. Akarnya tidak pasti. Berikut adalah beberapa teorinya.

1. dari akar bahasa Persia untuk "lagu"

2. dari bahasa Ibrani סלל :"meninggikan," yaitu, nada yang lebih tinggi

3. dari bahasa Ibrani נצח  berarti "selalu," berfungsi seperti "amin"

4. dari LXX yang menunjukkan selingan instrumen

Dengan semua teori itu jelaslah bahwa kaum modern tidak tahu apa yang dirujuknya dalam Mazmur. Ini digunakan lebih dari 70 kali dalam MT dan lebih dari 90 kali dalam LXX.

 "Dalan-Mu": pandohan on patuduhon sada pangungkapon (parnidaan masa nanaeng ro dope; bandingkon Psalm 16:11). Molo taida sian konsep teologina, hata dalan on tung massai ringkot na manggombarhon: sada harbangan manang sada dalan (Mat 7:13-27), sada parjumpangan pribadi na dibagasanna manuju tu Kristus (Jak 2:14-26). Dipangke Jesus konsep dalan on manggombarhon diriNa sandiri (Joh. 14 : 6). Ha-Kristenon ima sada parjumpangan na marsasahalak jala na niihuthon ni sada parsaoran siganup ari (Kekristenan adalah suatu pertemuan pribadi yang diikuti oleh suatu hubungan sehari-hari.). Panguhum ni Debata na taida dison ima tu mambahen angka bangso, marolopolop, marsuraksurak jala manogu angka bangso di tano on. Huaso panguluhonon ni Debata na badia i, ndada be holan tu halak Jahudi alai tu sandok tano on, na manundalhon dalanna (bertobat) jala porsea (Jer 16:19). Parpadanan nasian Padan Na Robi mambagabagahon sada pasupasu na balga situtu marhite angka suansuanan, di angka na mangoloi Ibana (3 Musa 26, 5 Musa 27-28). Lehononna do marlipat ganda angka parbue ni suansuanan ni jolma i. Joi godang do teolog mandok, Psalmen on di endehon ala pasupasu ni gotilon na tung mansai denggan. Alai na tumangkas sian saluhut isi ni Psalmen on ima taringot tu sihol ni roha ni Debata anggiat tung saluhut bangso on mananda Debata (ay 2 {3}) jala mangihuthon Ibana  (ay. 4 {5}) laos ala ni ima gabe taruli di pasupasu (ay 7{8}), laos sude ujung ni tano on manghabiari Debata; hata “mabiar” ima pandohan unduk, somba jala arga /hasangapon (Psalm 22:27; 33:8).

Sungkunsungkun – Sipahusorhusoron:

1.      Tu ise do hata ni Par-Psalmen on? Jala aha do na tinonahonna?

2.      Aha do bahenonta na gabe tema ni “Turpuk Jamita on”?

3.      Boha do pangantusionta taringot tu ayat 4 {5}?

Tapaimbar ma pangantusion ni par-Psalmen on taringot tu pasupasu dohot pangantusionta na mangolu di partingkian sisasonari on. Godang do nuaeng pangajarion taringot tu pasupasu dipatariashon alai holan tu dirina sandiri, jala pangondolhonna holan tu kemakmuran ekonomi manang keberhasilan ni parkarejoan manang bisnis. Siala ni ido, halak gabe holan tu boha asa dapotan pasupasu, ndang be tu Debata na gabe haroro ni pasupasu. Ndang hea muse tapingkirhon, nang halak na asing pe ringkot do dipasupasu i. Hita naung manjalo pasupasu sian Debata, unang holan mambahen i gabe milik sandiri, alai panghilalahon ma hagogok ni asini roha ni Debata i marhite na ra mangalehon barita haluaon asa lam tu toropna halak  na manghilalahon asi ni roha ni Debata. Nang tangiang sisaonari pe, nunga godang na manimbil sian pangantusion ni tangiang i sandiri. Isarana: sai tapangidohon do asa mangolu hita, alai ndang taparade dirinta mangadopi hamatean. Sai tapangidohon do dilehon 3H, alai ndang tapangidohon haserepon ni roha. Tangiangta asa olo Debata paubahon ngolunta, alai ndang hea hita paubahon rohanta. Sai tapangidohon do hasesaan ni dosanta, alai ndang olo hita manesa dosa ni donganta. Tapangidohon do asa tu surgo tondi ta, alai ndang taingot adong do api naroko i. Dipasupasu pe hita asa gabe pasupasu do. Amen!          

SELAMAT HARI BURUH, lam dipasupasu TUHAN i ma nasa siulaonmuna angka na denggan i, asa gabe pasupasu sandok buruh maradophon bangso on.  

bahan jamita Minggu, 24 April 2016; Ulaon Ni Apostel 11 : 1 - 8

Ev. Ulaon Ni Apostel 11 : 1 - 8

"Hamubaon ni roha asa mangolu"

Patujolo – Hatorangan

Mandok mauliate do nian hita bangso Batak, ala sahat barita ni Tuhan Jesus tu hita sahat ro di bagasan tingki on. Tarida ma i sian naung gumadang halak batak na mandok dirina “KRISTEN” sian angka sipelebegu manang halak na so mananda Debata. Ndang pola piga be nuaeng na tarbege na sada luat ni bangso batak na hot do pe di haporseaon si na parjolo, ima na manomba debata sileban. Sian parjongjong ni godang gareje pe nian, nunga boi dohonon naung godang do bangso batak gabe halak Kristen. Ndang boi tarrajuman sasintongna manang na songon dia do molo ndang sahat barita ni Tuhan Jesus tu bangso batak. Boi dohonon ra, gabe tu ripurna tu magona do bangso batak ala ni haporseaonna siparjolo i. Ndang tu majuna, alai gabe lam sumurut. Jempek hata dohonon, mauliate ma ala naung sahat barita nauli i tu bangso Batak. Alai, na gabe sungkun-sungkun...toho do naung mago haporseaon na parjolo i sian harohaon ni bangso batak? Boi do tutu targoar naung gabe halak Kristen, alai ndang na porsea di Debata manang ndang na gabe sitindangi ni Debata. Ala halak naung didihonon dibagasan Tondi, ingkon do na gabe sitindangi ni Debata. Ndada holan tardidi dibagasan aek. Asa taida ma manang na songon dia do sasintongna pengaruh ni barita na uli i tu sandok parngoluan ni hajolmaon. Dung hehe jala manaek Tuhan Jesus Kristus tu banua ginjang, tuat do Tondi jala saor dingolu ni jolma. Tu sandok halak na marhatopothon dirina na porsea, tu ibana do saor Tondi ni Debata. Tondi ni Debata na pinasaorna, ima Tondi hagogoon ndada tondi na hodar manang tondi hatahutan. Asa halak na sintong naeng marpanindangion, disi do dipargogoi Tondi i ibana. Alai halak na holan mambahen hagunturon, disi ma songgop tondi hahodaron i di ibana. Songon si Ap. Petrus, na sai dipargogoi Tondi i do ibana mamaritahon barita haluaon tu sandok jolma i. Ndang mardia imbar hasasahat ni barita ibana, ingkon tu sandok ujung ni tano on sahat barita ni Tuhan Jesus. Halak na manjanghon barita nauli i, dio halak na ginohan ni Tondi. Jala tu nasida do sahat haluaon na pinasahat ni Debata marhitehite AnaKNa Tuhan Jesus Kristus. Ai ndada be angka na targoar bangso ni Debata na gabe parjambar manang na gabe parsidohot di bagabaga na pinasahat ni Debata. Manang ndada holan halak na mandok dirina anak ni Debata, na porsea di Debata na gabe taruli di haluaon i, haluaon sian hamatean marhite hamubaon ni roha. (patudos: I Tesalonika  2:16“Diorai do hami manjamitai halak parbegu laho paluahon nasida; asa tongtong do nasida pagukgukkon pardosaon nasida, lalu ma antong tu nasida sungkot ni haririmas i.Yoh.  9:31 “Taboto do, na so ditangihon Debata angka pardosa, alai halak na mangkabiari Debata jala mangulahon pinangido ni rohana, i do ditangihon. Lukas5:32“Ndang na ro Ahu manjou angka partigor, asa dipauba rohana, angka pardosa, i do!). Ndang holan hulaon i jaloon ni halak sipelebegu, alai marragam nang angka pasu-pasu (karunia) pasahatonna tu nasida. Ai nang marhite sian nasida do lam  balga hataridaan ni barita na uli, ai nang  nasida, ala ni hamubaon ni roha nang Tondi na mangula di ngoluna i do umbahen olo jala boi nasida patupahon angka tanda tu godang jolma. Ay. 1: ayat on pabotohon angka “uluan ni huria” tarhalomong umbage barita na masa taringot tu barita na uli na sahat tu halak parbegu. Tarsonggot do nasida jala ndang pola gabe diparsitta nasida on. Ndang diantusi nasida taringot tu Parsuruan Nabadia i (Mat. 28:18-20; Luk. 24:47; Ul. Ap. 1:8). Hata “angka dongan”, sada pandohan do on na jolo di angka halak na porsea na sada do nasida na gabe sada ripe (keluarga: 1: 15; 6:3; 9:3, dna). Gabe halak Kristen ima pahothon naung gabe sada ripe nasida. Bangso sipelebegu manjanghon hata ni Debata: hata on patandahon ringkot ni panjaloon marsasahalak taringot tu parbaritaan barita nauli (Joh. 1:12; 3:16; Rom 10:9-13, Ep. 2:8-9). Pandohan “Hata ni Debata” tudos doi tu hata “Barita Nauli” (INJIL). Ay. 2: Misi taringot tu halak kafir na gabe parsoalan di Uluan na di Jerusalem di huria na parjolo. Hmubaon ni roha na mambahen nasida gaeb halak Kristen tontong dope diida sian parhoronghorongan na bangso. Marimbar dope di nasida Jahudi nag Junani (bnd. Ul. Ap. 15: 5; 21:18-26). Alai sai tongtong dope dijugulhon si Petrus laho mamaritahon Barita Nauli i, ai ndang ala rohana sandiri i, alai pangidoan ni Barita Nauli i sandiri doi na niulahon na i (1 Kor. 12:13; Gal. 3:23-29; Kol. 3:11). Ay. 4-18: dihatahon si Petrus do sude naung hea diulahon jala dihilala iabana di bagas ni si Simon dohot Kornelius (Ul. Ap. 10) tu angka uluan ni Jahudi di Jerusalem. On ma na patuduhon hinaringkot ni persoalan on tu hangoluan ni Huria i (penginjilan dunia). Hata “kathexēs” dipakke di Padan Naimbaru holan marhite si Lukas (Luk. 1:3; 8:1; Ul. Ap. 3:24; 11:4; 18:23). On sada konotasi na patoranghon sada horong na toho di roha jala martingki (temporal). Hombar do on tu ulaonna sandiri na sahalak dokter ibana (Luk. 1:1-4). Tu halak sipelebegu dilehon Debata hamubaon ni roha asa mangolu:  manang na piga sian isi ni Padan Naimbaru, pabotohon na adong do di Debata sada huaso mula ni hamubaon ni roha dohot asi ni roha  (Allah berdaulat adalah sumber pertobatan serta kasih karunia; Ul. Ap. 5:31; 8: 22; 2 Tim. 2:25}). Alai na gabe sungkun sungkun nuaeng. Boha do taringot tu huaso (kedaulatan) ni Debata tu alus ni jolma i manang tu silehonlehon ni Debata? Na haporseaon i do dohot hamubaon ni roha (Markus 1:15; Ul. Ap. 3:16, 19; 20:21) na gabe sada alus ni jolma manang silehonlehon ni Tuhan i? Hinorhon ni i, unang gabe holan marbandinghon angka na tarsurat i  hita manang cara-cara ni angka ragam ni ugamo molo manaringoti taringot tu hamubaon ni roha nang asi ni roha. Na sasintongna ima, holan Debata sandiri do namaniop dalan di saluhut na masa! Jala sai jotjot do on na gabe diondolhon di bukku Ulaon ni Apostel. Alai, Ibana sandiri jumotjotan marsaor dohot na angka tinompa-Na sandiri marhite parpadanan. Tuhan i do manontuhon masa ni ulaon i (Tuhan menetapkan agenda), alai jolma i ma na mambahen alus jala ingkon tongtong maralus. Ndang tarsirang pandohan na duaon, ingkon na rap do on, asa sintong na ginoaranna hamubaon ni roha dohot asi ni roha (Ul. Ap. 2:28: Alai didok si Petrus ma tu nasida: Pauba hamu ma rohamuna, dung i padidihon hamu ma ganup hamu tubagasan Goar ni Jesus Kristus, bahen hasesaan ni dosamuna, asa dijalo hamu silehonlehon i, i ma Tondi Parbadia i.)

Aplikasi:

Torop do hita manghatahon hata sidohonta dibagasan “roha sogo” manang “dendam” manang “leseng” pabotohon manang pasahathon na di rohanta maradophon halak na asing. Boasa songoni? Ai sai tarimpu do angka hata na tapandok i ndang marpangkorhon. Sae doi didok rohanta songon alogo sambing na mamolus. Adong hata na mandok:”hata i do hangoluan, laos hata i do hamatean (jea)”. Siala ni ido umbahen na gumodang halak marjea binahen ni hatana mangimbanghon sian pangalahona. Umbahen ido dipaingot hata  ni   Tuhan i tu hita:”Jakobus  1:19 (dijaha). Parjamita 6:11  (dijaha). Suang songoni do nang halak na laho manghatahon hata na denggan i pe, ndang be digohi Tondi, nunga be gabe holan kepentingan sesaat manang haburjon na mendadak. Hape ndang songoni na panangido ni Tuhan tu sandok halak na Kristeni. Ai halak naung dapotan Tondi, hatindanghonon ni ido hasintongan ni Debata. Ndang tarida be nuaeng haimbaron ni halak siihuthon Kristus dohot sian angka sisomba debata na leban (sipelebegu). Ai ndada goar i sasintongna na paimbarhon i, alai parange i do!On ma tongtong na tapeop, ai tu sandok jolma i do dipasahat Debata partingkian manang kesempatan di sandok parngoluaonna. Ndang diloas manontong angka pardosa i dhadosaonna. Ndang salelengna jolma na lilu i dihaliluonna. Dipasahat Debata do harohaon, asa anggiat olo nasida tumundalhon angka dalanna hian jala jumpangan dihamubaonna. Dung jumpang angka i, dipasahat do nang asiasi i (karunia) tu nasida asa tu dos nasida songon halak na sintong marhaporseaon tu Debata. On ma ulaon na umbalga sasintongna siulahononta dingolunta on. Ima gabe sitindangi hasintongan ni Tuhan i, ai ido hataridaan ni hita naung dohot hita ginohan ni Tondi ni Debata. Ai Tondi i do tongtong dididihon tu hita saluhutna (2 Timotius  1:7; 2 Timotius  1:14 (dijaha).

Ulaon on sahat ma tu sandok halak Kristen na umbage barita on. Ai on do na nidokna :”ENDEHON MA JAHOWA - Kantate”. Halak Kristen ingkon mangendehon Jahowa, dibagasan panghatindangion na sintong dibagasan Tondi hasintongan i. Ai ndada holan hita na ringkot dapoton haluaon i, dohot do nang donganta ingkon gabe taruli di haluaon i jala jumpangan hamubaon ni roha. Asa songon na tarsurat i Jakobus  5:19 - 20 (dijaha). Antong, tajanghon ma Tondi Parbadia i tu hita, asa sintong hita marpanindangion, manogihon angka na lilu i tu dalan lomo ni roha ni Tuhan i. Taruli ma sandok jolmai dibarita ni Tuhan Jesus, jala ndang manontong di hasipelebegunna. Di ganup tingki ma tahatindanghon i, marhite parange na denggan na patuduhon sintong hita naug gabe porsea di Tuhan i jala naung ginohan ni Tondi

Bahan Jamita Minggu, 17 April 2016: 1 Kronika 16:31 - 36

Ev. 1 Kronika 16 : 31 - 36 

 "Mandok mauliate ma hamu di Jahowa, ai na basa di Ibana"

 

Patujolo

Di partingkian ni panurirang Ezra, Jerusalem uttangkasan doi na gabe sada inganan hasadaon pamusaton ni parugamoon (ibadah) sian na gabe ibu kota harajaon ni Israel (boi do dohonon sahat ro di tingki on). Panurat Kronika manguduti hatoranganna na parjolo i di bindu 13, taringot tu sangkap na naeng mamboan Poti Parpadanan (Tabut Perjanjian: poti na sian hau na marlappis mas, dibagasanna adong dual oh batu, ima panuratan ni Patik Nasampulu. Suang songoni nang angka ugasan na badia nampuna ni halak Jahudi dipajamot disi {2 Musa 25:10-22; Heber 9:4-5. Ingananna pe ingkon diinganan nabadia {2 Musa 26:33; 40:21; Heber 9:3-4}; dimiaki/diurapi dohot miak na hushus jala na badia {2 Mua 30:26}. Dihaposi do na gabe tanda ni haroro ni jala hamuliaon ni Debata {4 Musa 14:43-44; Josua 7:6; 1 sam. 14:18-19; Psalm 132:8}, jala on do lambang hamuliaon ni Israel {1 sam. 4:21-22}, jala bangso Isarel sandiri manungkun Debata marhite na jongjong di jolo ni poti on {Jos. 7:6-9; panguhum 20:27; 1 Kronika 13:3}. Poti on ma sada partanda manang na bukti ni Parpadanan ni Debata dohot bangso-Na {2 Musa 25:10-22; 1 Raj. 8:1-9; Heber 9:4}. Dung dibuat halak Palistim poti on, alai ala ni panghorhonna na mambahen nasida gabe marsorion, gabe dipaulak ma muse poti on laos dipasimpanhon muse tu inganan na badia i. Hasahatna muse tu Jerusalem dihaposi nasida do boi manjagahon huta i sian angka na naeng marsangkap manegai huta i, nang pe muse di taon 586 sM marongso dibahen halak Babel) tu Jerusalem, jala na boi panghorhonna taida ima pamusataon ni parugamoon (ibadah) na hot dibagasan batas ni huta ni si Daud (tembok ibu kota Daud) na imbaru. Bindu 15 dohot 16 godang manaringoti taringot tu sada barita na dos dohot na tarsurat di 2 Sam. 6 : 12 – 20. Nambambahen on ima, di  bindu 15 : 1 – 15, patoranghon pangaradeon ni raja na tarlobi dipatorang disi, laho manjagahon asa unang masa angka ulaon na paroahon angka ulaon ni si Daud jala patangkashon manang naung adong do di joro i angka parende (ay. 16-24); angka parende i, mambuat sada ende sian Psalmen, pandohan mauliate sian si Daud na dipakkke ditingki pameakhonon di Poti Parpadanan di undungundung i (kemah) naung jumolo diparade hian (16:7-36);

Hatorangan – Aplikasi

Poti Parpadanan ni Debata, ima na patunduhon tanda haroro ni Tuhan i dohot pasupasu-Na maradophon bangso-Na. Siala ni ido umbahen songoni roha ni si Daud dohot bangso Israel mandok maulite jala marende psalmen na uli situtu manjanghon jala manghalashon hasasahat ni poti parpadanan i. Psalmen mandok mauliate on dipukka sian panogihonon laho mandok mauliate haburjuon ni Debata marhite angka ende na uli situtu jala na songkal, mangalului bohi ni Debata jala marningot saluhut angka naung pinatupa jala binahen ni Debata (ay. 8 – 13). Udut na i muse, lam dipatangkas jala lam tu torangna dibahen di ay. 14 – 22. Sian saluhut na i, boi idaonta pambahenan na denggan na pinatupa-Na, dibagasan dua horong:

1.     Tuhan i mangihot diri-Na tu bagasan sada parpadanan na manontong (perjanjian kekal) maradophon bangso-Na. Sada sian buni parpadanan i ima: pasahathon tano Kanaan na gabe tano warisan (tano walayat/pusaka) ni Israel (bnd. Ay. 17)

2.     Dipadanhon Debata do tu nasida pangaramotion-Na maradophon bangso-Na i. Jala na so loason-Na do angka bangso na asing na laho manegai manang mambahen na so suman maradophon nasida (bnd. Ay. 22)

Ende Psalmen on muse dipaudut dohot joujou tu sandok pangisi ni tano on (ndang holan tu bangso Israel) laho pabalgahon/manghamuliahon goar ni Debata. Ai sasintongna nunga be dibege jala diida nasida na binahen ni Debata na tung gok halongangan i na binahen ni Debata maradophon bangso-Na. Ibana ndada holan Tuhan ni bangso-Na bangso Israel, ala Tuhan ni saluhut bangso nang tano on. Tuhan Panompa  na Ibana Debata na mangatasi saluhut debata na asing. Ibana do Raja, ndada holan Raja ni Israel alai Raja ni portibi on (ay. 31).

Ndang adong nas asing na hinalomohon ni Debata asing sian pujian dohot pandohan mauliate na marsitutu na ruar sian roha na ias. Tontu, lobi uli jala sahal, molo pujian i dohot roha mauliate i ndada holan dipatuduhon dibagasan sada punguan partangiangan (ibadah), ala tangkas ma i dibagasan sada pambahenan panghobasion (pelayanan), na dibagasanna tarida na gabe pasu-pasu maradophon angka na asing nari. Nasida na tongtong dope mian dibagasan hadosaon jala na hot dope marsomba tu debata sileban (gana-ganaan, utiutian ni portibi on), asa diida ma Tuhan  na mangolu i, marhitehite ngolu ni angka anak-Na i (halak Kristen). Ulaon parugamoon manang ibadah ni Israel nunga ondol nian i na gabe ulaon ni marga Levi. Alai si Daud sandiri manguluhon pardalanan dohot pujipujian i, laos mangalehon pasupasu. Nuaeng taida ma jala na tajaha nuaeng on ima sada ende psalmen maradophon Jahowa na di ririt sian Psalmen 105, 95 dohot 106. Ende ni si Daud on, mangajari hita di taringot tu hinadenggan ni parugamoon (ibadah) na mambahen las roha ni Tuhan i. Ditingki masa partangiangan (ibadah), sintong do tutu na mandok mauliate do hita, martangiang, marende manang mar-Psalmen songon naung somal di joujou tu partangiangan i (bnd. Ay. 8 – 13). Alai na ringkot siingotonta, haringkotan ni partangiangan i ima: haporseaon na adong do Debata jala marsaor (ro) jala na olo do pe Ibana topoton ni angka na mangalului Ibana jala na patimbul Ibana. Tuhan i, ima Tuhan na satia di di angka Parpadanan naung pinatupa-Na. Laos on ma hagogok ni Padan ni Debata tu saluhut bangso-Na, ai naung dibahen Debata do Israel na gabe bangso-Na, mangalehon di nasida tano Parpadanan i (Kanaan), jala na mambahen di hadirion ni nasida sada tanda haroro jala hataridaan ni Tuhan i na boi idaon manang jahaon ni halak na asing (bnd. Ay. 14 - 27). Jadi hasasashat ni Poti Parpadanan i, unang be dihalupahon bangso i, ai disi do hataridaan ni hasasaut ni Parpadanan ni Debata. Hinorhon ni on, ingkon somba ma saluhut bangso i, jala toho ma nang alus ni nasida:”Amen! Jala puji-pujian di Jahowa (Psalm 106 : 47 - 48). Jadi, partangiangan (Ibadah) na sintong manghorhon manang mamparbuehon sada gogo na imbaru laho manghatindanghon Tuhan i (kesaksian adalah buah dari ibadah yang benar). Bangso na manomba Debata jala mangarajumi hamuliaon ni Tuhan ndang adong topina/ujung (batas), on ma na mangarahon sandok halak asa manghasiholi, manghatindanghon hamuliaon ni Tuhan i. Alai na jotjot do hita sala/gagal taringot tu partangiangonta (ibadah) laho manomba Tuhan i dibagasan hasintongan jala manghatindanghon Ibana. Alai, na ro do Ibana jala mangajari hita taringot tu sangkap-Na na naeng sipatolhasonta jala siulahononta sahat ro di na gabe olo hita marsitutu manomba Tuhan i jala na gabe sitindangi ni Debata.

Bahan Jamita Minggu, 10 April 2016: Pangungkapon 5 : 11 - 14

Ev. Pangungkapon 5 : 11 - 14 

Patujolo – Hatorangan

Nuaeng bongot ma hita tu minggu na parjolo dung ari haheheon ni Jesus, on ma na ginoaranna Minggu Miserecordias Domini: Sai endehon ma angka asi ni roha ni Jahowa. Goar ni minggu sadarion manjouhon manang manogihon saluhut halak na manghaporsea Krirtus naung hehe asa marende. Marende asi ni roha ni Jahowa marlapatan doi, marende dibagasan las ni roha ai nunga dipatuduhon Debata asi ni rohana dibagasan hatangkasanna, ima: hamamate ni Jesus jala haheheon-Na naung hita halashon. Ai sasintongna, godang do halak na so sintong do pe rohana laho manghaporsea i Jesus i sandiri, nang diangka naung mandok dirina Kristen. Ai tarida doi godang dope angka na manungkun hasintongan ni hadirion ni Jesus Kristus.

Jesus Kristus, ima hagogok/hasasaut ni saluhut naung digurathon/sinurirangkon angka panurirang di Padan Na Robi. Jesus Kristus na Ibana mangulahon lomo ni roha ni Ama-Na, ima paluahon saluhut jolma naung ni ihot ni dosa binahen pangoloion ni jolma i di sibolis i. Ai ndang adong na asing na boi pasaehon manang mangungkap bukku i dohot sahapna (materai) ia so Jesus i sandiri. Umbahen i do gabe digoar Ibana Singa na sian Juda (ay. 5). Nunga monang Ibana na manaluhon sibolis naing mangihot bukku i jala mambahen sahapna. Bukku i ma bukku haluaon naung niihotan ni sibolis. Ingkon tu hamatean do ujung na jolma i, molo dang diharhari bukku i dohot sahap na (ima bukku na pitu i;  manang na marpigapiga halak mandok taringot tu bukku i:  IRENEUS: isi ni bukku ima na manaringoti taringot tu Kristus. SWETE: isi ni bukku i ma taringot tu hangoluan sogot na so binoto, umbahen ido digoar ibana Bukku TADIR; MILLIGAN mandok: isi ni bukku i: PODA NASIAN DEBATA {nasihat Allah}; Di bindu on, holan onom sahap do na binukkana ,alai ianggo sahap na papituhon dang dibukka, dung pe mandapothon panghuling ni sarune, ari panguhuman i dipabotohon {8:1}). Umbahen ido gabe tangis ni si Johannes mansai ngotngot, ala sasintongna tung so adong do tutu manang na ise na tau umpukka bukku i dohot sahap na i. Laso mardomu muse, molo di ungkap sada sahapna i, ruar do galumbang na tung mansai rongom, ima muruk ni Debata tu angka siulahon dosa manang hajahaton i (bindu 6). Lam diondolhon ma, holan sada do na boi umpukka sahap i, ima anak ni Biru-biru naungbhona seat i. Marhite hamatean-Na i, nunga be tarida hamonangan jala takkas ma na Ibanado Singa Juda i. Ndada holan hatauon ni Jesus na boi umpukka sahap i na niondolhonna dison, alai dohot nang haingkonon na ingkon manomba Yesus. Angka tangiang manang sandok pangidoan ni haporseaon ni jolma i, holan Ibana do na tau boi manjanghon jala patulushon i (ay. 5). Lan muse, ai marhite mudar-Na sandiri naung ditobus do hita (ay. 9 -10). Nunga dipauba Ibana rumang ni ngolunta . Songon dao ni langit tu tano on tongtong dope dang boi manggombarhon Jala digombarhon doi Ibana tudos songon naung mangaropukkon hajinjanganni roha ni sandok parhuaso na di portibi on songon na ginombarhon di Daniel 7 : 7 – 8.

Saluhut bangso na tinobus di Padan Narobi nang di Padan Naimbaru, jala saluhut tahe pangisi ni tano on dohot sandok tangiang ni angka nabadia pasangaphon Anak ni Birubiru ni Debata. Jala Ibana do tutu na tau manjalo bukku naung sinahapan i jala mandalanhon panguhuman tu sandok portibi on, ai nunga digohi Ibana sandok sangkap ni Debata marhite pangoloion-Na nang pe i ingkon mangadopi parsorion nang hamatean. Ido umbahen na didok Ibana ima Birubiru ni Debata na martanduk pitu jala Singa ni Juda.  

Ayat 11 – 12 : Pamujion i na patutu doi tu Ibana, ai Birubiru ni Debata i nunga gabe pelan Ibana alani hita jala humongkop jolma i. Ibana dipuji marhite pitu gombaran manang rumangna. Opat sian i patuduhon manang na songon dia do rumang hadirion-Na sandiri. Jala tolu nari patuduhon rumang ni parngoluan ni hajolma on i dohot roha manang pangalaho ni surusuruan i maradophon Ibana. Marnida sude na masa i, jala marnida saluhut hinbalga ni pambahenan ni Debata marhite Anak-Na Tuhan Jesus Kristus, sai songon na marnida torop surusuruan, nang angka parngolu nang angka sintua i marsoara na gogo. Torop ni nasida ndang habilangan. Pamujion ni nasida saluhutna ima di na laho pabotohon tu sandok isi ni tano on: Tuhan i ima na ginoar Birubiru ni Debata, na tau do Ibana taruli jala sandok pangisi ni tano on mandok tu Ibana: gok pujipujian, sangap, hamuliaon jala huaso tu Ibana. Ayat 13 : di ayat 6: parnidaan ni si Johannes nunga lam dipabidang, ima na gabe boi ibana marnida Tuhan Jesus. Lam dipaherbang ma muse parnidaaan i i ayat 11, asa laos boi ibana marnida angka surusuruan di banuaginjang. Suang songoni ma nang di ayat on, si Johannes boi umbege saluhut na jinadihon ni Debata. Marhite na mandok banuaginjang , tano dohot na ditoru ni tano nang aek (laut) nang saluhut pangisina na adong i. On ma na ringkot sipahusorhusoron nang siparrohahononton, ai on nama tampuk (puncak) ni saluhut pamujion i na boi pinatudos tu saluhut angka galumbang na sahat rodi angka topina. Ai nang panobusion-Na sahat do ro di saluhut-Na na tinompa-Na i. siala ni ido, ingkon saluhut angka na tinompa na i mamuji Ibana. Ayat 14: Di bindu 4 : 8 – 10, sandok pujian na ginombarhon dibagasan inganan habadiaon harajaon ni Debata (tahta kemuliaan Allah), dipukka na opat parngolu i (empat makhluk) dohot na dua pulu opat angka sintua laos dibagasan bindu on, pujipujian diujungi nasida muse. Ala dirajumi nasida, saluhut dapotan tua (pahala) na uli situtu naung dibagabagahon molo olo nasida mangulahon lomo ni roha ni Debata sahat ro di ujungna sogot. Di bindu 4 dohot 5, nunga diboto angka na manjaha i taringot tu partingkian i, ima ditingki Raja Panobus i mangidohon sian Debata Ama, asa teanteanan-Na (warisan) diparade laho pasahaton-Na  marhite hamamasa na paiashon hajolmaon i, asa boi nang Ibana padirihon/pajongjonghon harajaon-Na jala nasida na mangoloi jala satia rap dohot Ibana mamarenta.

Siboanon tu jamita – sipahusorhusoron

1.         Adong do di hilala rohanta haimbaruon ni parngoluanta dung salpu hita mar ari-Paskah i? Na sasintongna ingkon adong do nian haimbaron ni ngolu andorang so mar-Paskah sian na dung mar-Paskah. Alai ianggo halak na so boi mangauhon saluhut na masa dibagasan parningotan ari hamamate-Na sahat ro di ari haheheon-Na i, tung mansai maol doi manghilalahon hamabaon ni parngoluan i, tarlumobi haimbaron ni pangantusionta taringotu tu Tuhan i sandiri

2.         Halak na mangauhon i saluhut na binahen ni Debata marhitehite AnakNa Jesus Kristus, ingkon sintong do nang pamujion ni nasida. Ai halak na marnida hinauli jala angka denggan do na olo mamuji.

3.         Marhite turpuk jamita on, ditogihon jala diarahon do hita marende, marlas ni roha, ai nunga lam dipatangkas be tu hita manang na songon dia do holong ni roha ni Jahowa tu sandok pangisi ni tano on. Naung di harhari Tuhan i do hape saluhut angka sahap (materai) na mambahen hita tu hamagoan i.

4.         Ai holan Jesus do na boi manjalo jala umpukka sahap i, hinorhon ni i holan tu Ibana ma tatuju mata ni haporseaonta, ai di Ibana do hatuaon ta, jala di Ibana do hangoluanta. Tu hita do dibagabagahon hatuaon i, jala dapotan do hita disi, molo taoloi jala satia hita di na mangulahon lomo ni roha ni Debata marhite pangoloionta di Birubiru ni Debata i, ima Jesus Kristus naung mate jala hehe. Hita ma na gabe siparmonang i.