Bahan Jamita Minggu, 13 desember 2015; Jesaya 12 : 2 - 6: ADVENT III

Ev. Jesaya 12 : 2 - 6

“Marende ma hita, ai naung saut malua hita”

Patujolo

Taboto do manang na songon dia roha dohot pangalaho ni bangso Israel. Tung mansai “tangkang”, “ginjang rohana”, “pangalo”, tung tama do nasida hona rimas ni Debata laos ingkon diuhum. Ala ni tangkang nag ginjang rohana, sai mulak ulak do rohana, ndang adong jumpang hasetiaon, sipata do burju jala gabe sipangoloi, alai ndang leleng i, muba do muse, songon halak na lilu ndang diboto be mulak, jala songon halak na tinggang alai dang diboto be laho hehe. Alai sude i, ndang mambahen mansohot holong ni roha ni Debata, ndang marujung asi ni rohaNa marnida nasida. Ginjang roha ni bangsoNa i, songoni do nang roha na marpamuati di Debata. Tangkang rohana, songoni do na pangajarion i sai dibahen Debata. Marbalik roha nasida tu debata sileban, songoni do nang huaso pangurupionNa sai dipatuduhon Debata. Hinorhon ni rimas jala uhum nasian Debata, sasintongna nga ingkon jumpang biar ni roha di nasida. Jala biar ni roha on, ndang tu hamubaon, gabe tu hatangkangon do dohot pembrontakan. Marpamuati do roha ni Debata tu nasida. Dibahen pe uhum, uhum hasitongan doi, asa mangolu nasida jala asa diboto nasida mulak tu Debata. Tarrimas pe Ibana, asa diboto nasida na holong dope roha ni Debata di nasida, ai ndang lomoroha ni Debata mago nasida jala tu hamatean na saleleng ni lelengna. Hinorhon ni on ma ditgihon saluhut bangso i, asa diida nasida na binahen ni Debata jala dipanghilalahon, na patuduhon ma marhite sian las ni rohana jala ndang adong be biar ni roha i. As alas ni roha dipatuduhon nasida marhite sian parendeon (mazmur: 2 Musa 15:2; Psalm 118: 14). Saluhut na ma bangso marhaposan tu Debata, ai Ibana sadiri na gabe hatuaon di angka jolma na olo mulak tu Debata (ay. 2: “Ida ma, Debata do hatuaonku, Ibana huhaposi, jadi ndang mabiar ahu, ai Tuhan Jahowa do hagogoonku dohot pujipujianku dohot manjadi hatuaon di ahu.”) On ma na patuduhon, nuaeng rimas ni Debata nunga be dipahosing, jala na ro do Ibana mardongan pangapulion dohot psupasu na imbaru (Jes. 40:10-11). Nuaeng pe, ingkon ro na ma bangso i, psahathon dirina, porsea jala manghirim tu Ibana, huhut mambolongkon roha biar (Psalm. 118:6; Rom. 8:31).

Hatorangan

Ay. 3. “Jadi marlas ni roha hamu manahui aek sian mual ni hatuaon.” Hata hamu: pahothon hata punguan ni saluhut bangso Israel, manang panogihonon tu saluhut nasida, ndang pribadi lepas pribadi, ai sadari dipatuduhon Debata holong ni rohaNa, ndang be marserak bangso i, alai nunga gabe dipasada be nasida muse. Saluhut nasida naung pinasada i, ingkon manahui dohot roha na las, jala dang adong be disi parsigulutan, ndang marsihompitan nang songoni torop jala balga ni nasida songon sada bangso. Ingkon dapotan/taruli do nasida ganup, ingkon marlas ni roha jala mandok mauliate. Aek sitahuon ni nasida ruar sian mata aek mual na marjullakjullak jala tung mansai godang, siala ni i do boi dohot mura nasida manahui i, jala dilehon doi secara “gratis”. Aek i sandiri pe, ndang aek na somalsomal i, alai aek na tung mansai tabo, ias manang aek na luar biasa, ai aek i ma aek “HALUAON” (air keselaatan), na Debata sandiri do mualNa, mual ni HANGOLUAN i (patudos: Joh. 7:37-38; 4:13-14). Ende on, ingkon marsaringar ma on manontong ditongatonga ni bangso Israel jala gabe sada ende pujian digodang ni ragam ni ulaon (upacara) ni nasida, isarana: a). ari Parlapelapean (Hari Raya Pondok Daun; 2 Musa 23:16; 34:22; 3 Musa 23 : 33 – 44; 5 Musa 16:13; Joh. 7:2); b). Ari haluan si Misir laho mamongoti tano Kanaan (4 Musa 21 : 17 – 18). Ay. 4 – 5:”jou hamu gaorNa”: on ma goragora dibagasan partangiangan (ibadah: 1 Musa 4 : 26; 12 : 8; 2 Musa 34 : 5 – 7; Rom 10: 9 – 13), ala goar-Na i ima patuduhon haroro-Na manang hasasaor-Na, jala ido nang pangalaho-Na. Marhite na dijouhon goarNa, na pataridahon na ringkot dope di hajolmaon i Debata, jala naeng songon Ibana hita huhut mambahen las ni rohan-Na. Boho do asa manjadi i? Ingkon dibagasan roha ni jolma i pangoloion nang roha nang marsada/marsaor (Jes. 43:1; 45: 3-4). Goar ni Jahowa na ingkon do: pujion (Joel 2:26), dihaholongi (Psalm 5:11), sipapataron (Psalm 22:22), sihabiaran (Psalm 52:9); sibaritahononhon (Jes. 12:4), alai unang di: pale (hujat: Jes. 52:5), diramuni (Jer. 34:6; Hes. 36:21-23). Jadi na boi do sude jolma i mansorminton Debata, manang na denggan manan na roa, ala hita tasorminton ma Ibana dibagasan hatongamon nang habadiaon (Mat. 5:13-16). Ayat 6: SION: pandohan on mangondolhon bagas joro na di Jerusalem, di inganan ni surusuruan Kerubim di ginjang ni poti parpadanan i,  na dihaposi ondolan ni hajongjongan ni Jahowa., na disi boi di ida hadomuan langit dohot tano on. Laos on ma hadomuan ni hata “IMMANUEL” (Jes. 8:8; Mat. 1 : 23), na marlapatan:’donganta ma Debata”. Ndang adong pasupasu na umbalga sian marhite haroro ni Jahowa jala adong parsaoranna dohot Ibana. Ibana do na marhuaso di atas ni saluhut angka bangso-bangso nang saluhut na adong di tano on. Mambaritahon huasoNa jala hamuliaoNNa itu ulaon jala tanggung jawab ni angka halak na marhaporseaon, sahat tu ujung ni portibi on (bnd. Mat. 28:19). Habadiaon ni Debata on ma na tung mansai ringkot jala tangkas pangondolhonon ni Panurirang Jesaya, songon na tarjou ibana di Bagas Joro (Jes. 6). Siala ni ido jotjot do digoar Debata:”Nabadia, Debata ni Isarel”. Debata do na tumimbo (MAHATINGGI: transcendent) jala mian ditongatonga bangso i (immanen)

Sisungkunon/sipahusorhusoron

1.  Taboto do na tangkang roha hita? Hea do tahilala sian roha na ias jala bagas namardosa hita tu Debata?

2.  Aha do haimbaron ni uhum dohot holong ni Debata?

3.  Tingki sadihari do hita manghilalahon na di uhum Debata hita, jala na diasi Debata hita?

4.  Marserak do jolma i hinorhon ni pangalaho hadosaon i. Ai laos ido do panghorhon ni hagogok ni dosa di roha ni jolma, ai ndang mardomu na tiur tu na holom

5.  Advent III, lam patangkashon tu hita taringot tu holong ni roha ni Debata. Dibagasan holong ni roha ni Debata jumpang do haluaon. Haluaon ni jolma sian arsak, biar dohot saluhut angka na mangihot jolma di portibi on

6.  Manghilala ma nian jolma i, naung jonok do ari ni Tuhan i,  unang be sai tarlalap. Sadia leleng nari nian jolma i tarpodom, manutup simalolongna marnida na masa na di tano on dohot nasa tu bagasan hadirionna sandiri.

7.  Molo na saleleng on mabiar hita mate, mate na saleleng ni lelengna ala dosa i, nuaeng ro sada ari, ro sada kesempatan, ditogihon Tuhan i hita asa marlas ni roha. Marlas ni roha manahui aek hangoluan dibagasan Ibana.

8.  Halak na ro, jala na minum sian aek hangoluan i, tung so olo be mauas.

9.  Haluaon na pinarade ni Debata, ndada haluaon PRIBADI alai saluhut do hita boi dapotan manang taru;i disi. Ndang pola marsisosahan be hita manahui, ai ganup do hita diparade, ndang hahurangan jala singkop diparade Ibana di hita

10.  Antong, hamubaon ni roha dohot roha na ra solhot tu Ibana, ido na ro jala na mangharingkopthon Debata

11.  Parbadia ma Tuhan i, ai na badia do Ibana laho pasaehon haramunonmu. Pasangap ma Debata, ai na sangap do Ibana, mambahen ho gabe malua sian haleaonmu

12.  Marende ma ho, tanda las ni roham di holong ni roha ni Debata na jinalom sadarion. Amen!

Bahan Jamita Minggu, 06 Desember 2015: Pilippi 1 : 3 - 11- ADVENT II

Ev. Pilippi 1 : 3 - 11 

“Diboto Tuhan i do na ni ulami”

Patujolo: Ayat 1-2: pandohan na parjolo na mangarongkom sude isi ni surat on. Huria dohot si Paulus, adong do sada hubungan na denggan jala uli. Marlas ni roha apostel ala adong ditongoshon tu ibana bantuan parhepengon sian tingki tu tingki (1:5,7; 4:15) ima huria Tesalonika (2 Kor 11:9).  Ayat 3-8 ima tangiang mandok mauliate ni si Paulus tu huria Pilippi. Ayat 9-11 ima tangiang ni si Paulus tu hatorason nang partumburon ni haporseaon ni huria i. Ayat 1:1 "Paulus" sian hata Gorik na marlapan  "metmet." Adong manang piga teori haroroan ni goarna:

1. Ala ni pamatangna: si Paulus pendek, mokmok, pampang (berkaki bengkok), beralis lebat dan mata menonjol. 2. Evaluasi rohani pribadi Paulus, songon na di ayat-ayat 1 Kor 15:9; Ep 3:8; 1 Tim 1:15, disi didok ibana dirina:”na ummetmet sian angka halak nabadia”  (boi sajo doi ala didok rohana ibana do silelei halak Kristen, Ul. Ap 9:1-2).Di surat Galatia, diondolhon ibana do hadirionna na tu dos dohot Apostel na 12 na i (1 Kor 15:10; 2 Kor 11:5; 12:11). 3. Sian natorasna. Somal do halak Jahudi na tading diluar ni Palestina (diaspora) dibahen dua goarna ditingki sorang. Goar Heber na ima: SAUL, jala goar Gorikna ima: Paulus. "Timotius" marlapatan: "dihormati oleh Allah" manang "kehormatan dari Allah." Inongna Jahudi (Ul. AP 16:1; 2 Tim 1:5) jala amangna Junani (Ul. Ap 16:1). Ia bertobat ditingki pardalanan ni Ap. Paulus na parjolo tu Derbe/Listra (Ul. Ap 16:1). Dijouhon ibana asa manggantihon Johanes Markus (Ul. Ap 15:36-41). Disuruhon si Paulus ibana secara khusus tu Pilipi laho mangurupi huria i (Ul. Ap 19:22; Pil 2:19-24). Ayat 3: “Mauliate hudok…” marlapatan doi: (1) siala pangurupion parhepengonna manang (2) hasomalan patujolo ni hatana na mangondolhon hata “huingot” songon na di Rom 1:8-9; Ep 1:16; 1 Tes 3:6; Pilemon 4. Ayat 4 "hutangiangkon…." Las ni roha sada hata na tung mansai diondolhon do dibukku on (1:4,25; 2:2, 29; 4:1); laos tumangkas maon siala ni ibana na di hurungan (penjara) jala mangadopi uhum mati. “hamu sudena” naeng padiomuhon nasida hinorhon ni parbolatbolaton na masa siala ni angla guru-guru pargapgap ni halak Junani manang eksklusivisme Yahudi. Ayat 5: Istilah kunci ini (koinōnia) marlapatan:

1. "rap mangulahon sa” (partisipasi bersama dalam); 2. "marsada dibagasan" (4:15); 3. Sada pandohan laho pasahathon sihumisik (Pil 4:15; Rom 12:13; 15:26; 2 Kor 9:13; Gal 6:6; 1 Tim 6:18). “Sian mulana i sahat ro di nuaeng” marhadomuan do on tu Ul. Ap 16:12-40, on ma na manggombarhon jala na padomuhon sude parulaon pangurupion ni nasida di parbaritaan barita na uli (zending). Ayat 6: ingkon jumpang sada keseimbangan dibagasan holong na pinungka ni Debata jala alus ni haporseaon na parjolo jala manontong sian hajolmaon. Boi do patuduhon tu: 1. Mula ni huria i. 2. Mula ni nasida na parsidohot dibagasan parbaritaan barita nauli. 3. Mula ni haluan ni nasida, pribadi lepas pribadi. Ari ni Kristus, on ma haroroNa na paduahalihon naung somal ditariashon Paulus dipamuhai ni angka suratna(1Kor 1:7,8; 2 Kor 1:10; Kol 1:5; 1 Tes 1:10; 2 Tes 1:4). Hamamasa ni eskatologis taida nang di Pil 1:6,10; 2:16. On ma sada pangondolhonon na gabe sada ari na istemewa do ari i, ai disi ma nang jolma i pajumpa dohot Jesus (naung gabe Sipalau jala Panguhum). Padirion ni Debata do hadirionNa marhite Mesias-Na laho pajongjong sada partingkian na imbaru (zaman baru), na ginoaranna ari ni Tuhan. Pandohan on tartuju doi tu Kristus. Harorona na parjolo ima naung gabe jolma Ibana songon na sinurirangkon ni angka panurirang di Padan Na Robi. Sasintongna halak Jahudi ndang pola mangharinghothon halak na Tumimbo (Ilahi), alai hadohotan ni na-Tumimbo ido disude persoalan na masa. HaroroNa na dua i patuduhon: Ibana sahalak HAMBA na MENDERITA jala Sipalua jala sada nari na gabe Panguhum jala Tuhan ndang pola i diharingkothon jala tangkas di halak na di Padan Na Robi. Ibana sandiri do na mamuhai jala Ibana na mangarimpuni sian salauhut panghopkopNa (pengorbanan: Rom 12:1-2) Ap. Paulus manghilala sada do ibana dohot huria dibagasan roha (jiwa) dohot panghobasion (pelayanan). Ala Debata do saksina (ay. 8), on ma sada janji ni si Paulus, jala on ma sada sian na patuduhon hasintonganNa (Rom 1:9; 2 Kor. 1:23; 1 Tes. 2:5, 10), “dibalga ni siholhu mida hamu sude” : patuduhon hinabalga ni roha ni si Paulus naeng tongtong rap dohot nasida (Pil. 4:1; Rom 1:11; 1 tes. 3:6), “mangihuthon pangasi ni Kristus Jesus”: Ay. 9-11: Tangiang ni si Paulus marhitehite huria i, asa adong sada model ni ngolu (gaya hidup/iman) mangihuthon Kristus sian halak na porsea. Jadi sian ay. 3-8: ima maringan ma nasida di bagasan Kristus i. On ma na padomuhon dua horong sian haluaon i: hita maringan dibagasan Kristus i dohot hita gabe marnampunahon i, ai nunga tudos songon Kristus i hita. Panaringotion taringot tu haluaon na didiok di bibel: holong, asi ni roha (anugerah) jala holong na satia na sian Debata sitolusada i, ido na marhatoguon (berdaulat). Tung so saut do malua jolma i ia so ala ni pangulaon ni Tondi Parbadia. Dibahen Debata do partingkian asa olo jolma i mambahen sada alus di bagasan haporseaon dohothamubaon ni roha, sian mulana jala na manontong so mubauba be. Na mangula do Debata rap dohot jolma i dibagasan sada padan (perjanjian), di na di si jumpang hak dohot tanggung jawab. Di parade do haluaon i di jolma i, hamtean ni Jesus ima pasaehon tarigot uhum ala dosa sian na tinompa ni Debata naung madabu i. Nunga diparade Debata dalan jala manghalomohon saluhut na tinompaNa i mangalusi holongNa dohot lomo ni rohaNa dibagasan Jesus.

Aplikasi

Parsaoran ditonga ni huria i nuaeng on nunga be dang “TABO” dihilala, ai nunga ngali jala perjek (dangkal). Holan saotik na ma ruas ni huria i na olo rap mangulahon, na olo marsitandaan manang mar-aleale (bersahabat). Lam otik muse roha na olo marsitutu manghobasi huria i, ndang adong be na tangiang masitangiangan, manangiangkon uluanna dohot manggogoihon (mendukung) nasida  dibagasan gogo na marsitutu. Na marasing situtu i dohot huria di Pilippi dohot parsaoran ni si Paulus dohot huria i. Boi do on gabe tiruan di hita manang didok rohanta, tarhona songoni, manang tarulahon hita. Na rigkot siigothon sasintongna: boi denggan sada huria ala arga do pe di huria i “GOAR NI KRISTUS” i. AI ganup huria ndang mambahen Kristus i na gabe parsidohot di huiria i manang Kristus dang be sada keluarga dohot halak Kristen. Tarida ma i ndang Kristus i be na gabe dongan sapanghonbasion maradophon huria i. Saluhut parsaoran na di huria i nunga be dibahen ala ni parsaoran hajolmaon. Parsaoran partondion ndang tarjalo manang ndang tarojakhon jolma i be. Taida ma, godangan do persoalan pribadi manang persoalan di par adatan, manang persoalan kelurga na gabe manegai huria i.  Alai taida ma huria Pilippi, na sada panghilalaan do nasida, manghilalahon na rap majalo asi ni roha ni Debata. Nang dipenjara si Paulus alai ndang dao roha ni nasida, jala saleleng si Paulus dipenjara, saluhut do nasida rimpa manghobsi huria i.

Huria na magodang ima molo sintong do parsidohot Kristus i mangula di huria i. Si Paulus manangiangkon huria i, asa martumbur huhut magodang huria i dibagasan panghobasion (pelayanan), magodang dibagasan hiolong ni roha, magodang dibagasan pangantusion taringot tu hasintongan, ala ni asa diboto nasida mangulahon hasintongan i sandiri (ay. 9-11).

Haporseaon ni si Paulus maradophon huria Pilippi, ndang holan ala ni pangulaon ni Kristus di bagasan roha nasida, alai gogo dohot pambahenan ni nasida holan ala mampartahanton haporseaon (Pil. 1:5, 7; 4:15-18). Hasetiaon ni Debata sai na adong doi tu halak na porsea jala satia, alai hasetiaonNa i ndang marguna i tu  angka jolma na so manjanghon, na so manjalo holongNa i. Antong: aha do sasintongna na mambahen huria i gabe “TABO” jala gabe huria sidok “MAULIATE”? : ala godang ni ruas do? Ala ni gedung gereja nab alga, bagak, lengkap dohot peralatanna do? Ala program kerja OK, jala torop parsidohot ruasna? Dang ala ni: alai ala: rap saoloan ruas ni manghobasi barita nauli di huria i (melayani injil). Sude na gabe parsidohot mendukung hararat ni barita na uli maradophon halak na asing,tarlumobi nasida sadiri gabe magodang dihaporseaon ala ni barita na uli.  Panimpuli: HURIA NA MAGODANG UNANG TAIDA SIAN UKURAN HAPORTIBION (DUNIAWI). Huria na magodang ima HURIA NA SETIA MARBARITA NAULI jala MAGODANG DIBAGASAN HAPORSEAON. Amen!