Bahan Jamita Advent I, Minggu 29 Nopember 2015; Jeremia 33 : 14 - 16

EV. JEREMIA 33 : 14 - 16 

“Panghirimon di hamubaon”

PATUJOLO   

Saluhut do jolma on manghirim asa jumpang angka hamubaon. Siala ni ido umbahen siganup ari na i mangula jolma i, nang di balian, di huta nang angka ulaon siganup ari, sude nai adong do na pinaimana manang na hinirimna. Ai ndang adong labana mangolu, ia so adong na hinirim. Panghirimon martujuan do i tu hamubaon. Alai boha do taringot tu hamubaon ni roha nang panghaporseaon maradophon Tuhan na hinaporseaonna, on do na gabe sungkunsungkun sian turpuk jamita on. Ai dibagasan turpuk on, nunga tangkas dipatuduhon Debata pambahenan holong tu saluhut jolma na tinompa na i, marhite sian naung dilehon sada janji manang bagabaga haluaon di jolma i. Nuaeng, boha do jolma i manghangoluhon bagabaga i? Dipareahi do manang ditundalhon manang diparsoadahon. Tarlumobi molo sai tapaihutihut, ndang hombar tu haporseaon i be angka na taula, na tahirim, jala hamubaon i pe gabe ndang jumpang di hita. Ndang tarida be dia do nuaeng imbar ni halak na mandok dirina porsea di Jesus dohot na so porsea di Jesus i. Antong, marhite advent I on, ingkon tongtong do patubuhononta angka pambahenan na patuduhon hita na halak Kristen, ima sian angka parange na denggan na so mubauba hinorhon ni gogo ni portibi on na mambahen hita sipata gabe sumusa manang di na so lam taantusi manang na songon dia do pardalanan ni bangso ta on, na lam leleng lam so boi denggan. Tarida ma i sian na  lam martamba angka na pogos gabe tu hajahaton...na mora tu pangarupaon.

HATORANGAN NI TUPUK

Di na naung lam mandate roha ni bangso Israel di habuangan Babel, hinorhon ni na so sonang be roha nasida manginganton na so huta na, na sai jotjot ma nasida ndang boi be songon na somal mangulahon hombar tu parugamoon ni nasida, disi ma nang Debata mangalehon bagabagaNa tu bangso i, na mandok na tongtong do di haholongi Debata nasida jala uhum holong do pinasahat ni Debata. Boi ma dohonon bangso Juda (Yehuda) nunga dibagasan masa kritis. Nunga bongot be tentara ni Babel tu Jerusalem, siala ni ima gaba tubu ma di roha ni nasida:”Ise nama na boi pangondian jala paulihon on? Pagogohu do bangso Babel on ianggo di nasida, umbahen na tolap ni nasida mambahen sada paraloan ai tangkas diida nasida bangso Asyur pe nunga ditaluhon nasida. Alai, holong ni rohaNa pasahathon janjiNa, naeng paulionna nasida jala mulak songon hinadenggan ni na parjolo i (33:13). Tarida ma i sian hinasintong ni pambahenan di Debata tu nasida, asa nian mangolu jala malua nasida sian hasusaan ala dosa i. Sian angka panurirang na parjolo, nunga tangkasa dipabotohon Debata bagabagaNa tu angka na olo mulak tu dalan ni Debata. Nang di uhum Debata nasida, alai sai ungkap do dalan laho mulak tu Debata. Alai tung ahama labana i sasude, molo so adong na gabe uluan na gogo dinasida. Ai so adong uluan ni nasida manang rajana na boi mangulhon manang manotophon ulaon hasintongan, dohot mangaturhon ngolu na marugamo na boi mamboan bangso tu adopan ni Debata, siala ni ido lam dipaudut Debata do sandok janjiNa (bagabagaNa) taringot tu ngolu ni bangsona.

On ma nuaeng na pinatariashon ni panurirang Jeremia, paboa hinasintong ni hata ni Debata. Ai si Jeremia sandiri pe, tung mansai marungkil do hinorhon ni uhum na jinalo ni bangso i sian Debata, jala ibana na patariashon uhum i. Dison adong dua makna ni pandohan ni Debata:

1.        Sai manontong do holong ni roha ni Debata. Ndang tarunsat angka bagabaga ni Debata naung pinatariasNa tu ompu ni bangso Israel (Abraham, Isak dohot Jakob). Nang pe tarrimas Debata na manghorhon habuangan dohot parhatobanan, alai na sai pabangkitonna do raja na boi paluahon nasida sian uhum i. Manang...haluan haportibion (Kebebasan dari pejajahan dunia/kemerdekaan dunia).

2.        Ndada holan raja ni Israel na binagabagahonNa i. Alai sandok Ibana na gabe Raja ni portibi on.

On ma na nidokna “haluaon bolon” (Keselamatan Universal).

Boasa pola patuduhonon ni Debata i? Asa disi ma sasintongna idaon ni jolma jala panghilalahonon ni jolma na sintong do Debata di saluhut angka na binahenNa. Ndang hea  marsala Debata, jala di Ibana do sandok huaso di banuaginjang nang na di tano on. Ai ndada holan rimas na pinamasa ni Debata tu halak Israel, alai dohot do nang haholongon ni Debata marhite sian na malua sian hamaolon i, manang malua sian uhum i.

Secara pastina, dipabotohon ma tu bangsoNa marhite tumbur ni si Daud na boi pajongjonghon hasintongan (keadilan), asa dibagasan hasongan nang las ni roha bangso i (hidup dalam damai sejahtera). pahotonNa ma padanNa tu si Daud dohot tu sude pinomparna, jala sian nasida ingkon bangkit raja (Andorang so tajaha jala tapahantus pangantusion taringot turpuk jamita on, ingkon jumolo do hita marningot manang na songon dia do pardalanan ni ngolu ni si Daud sian sihaetehonna sahat tu na dipangkit Debata ibana gabe raja na manggomgomi bangso na tarpillit i, bangso ni Debata. Ai dibagasan i do jumpang hita udut ni bagabaga ni Debata sijaloon ni Daud tu joloansa on taringot tu ngolu ni bangsoNa nang saluhut jolma nang pangisi ni tano on;  2 Sam. 7:12-16). Sahat rodi tingkina, ndang hea dope disundati Debata bagabagaNa, nang tung godang angka pangalaho pardosaon ni bangsoNa nang si Daud sandiri dohot pomparanna. Jadi boi ma dohonon:”pamangkulingion nang uhum na pinamasa ni Debata tu pomparan ni si Daud na so satia tu Ibana, on do sasintongna na patuduhon hasetiaon ni Debata dibagabagaNa sandiri (PerjanjianNya kekal)

Aplikasi

1.     On ma na naeng idaonta di asi ni roha ni Debata. Ndang diloas Debata jolma i mate dibagasan hadosaonna na mambahen hamatean na salelenglelengna. Alai lomo ni roha ni Debata, mangolu jala dapotan hangoluan na salelenglelengna jolma. On ma bagabaga naeng si jaloonta sadari on sian Debata. Ai paubaon ni Debata do ngolu ni angka na manghirim di haluaon na binoanNa. Na marsak gabe marlas ni roha, na marsahit gabe malum, na pampang gabe mardalan denggan, na mapitung gabe buha simalolongna. Sandok marolopolop sandok tano on ditingkina na so taboto dope. Siala na so taboto disi ringkot manbgolu jala patubuhonon panghirimon, jala na so taida dope. Antong, pos ma rohanta, sai na paubaon ni Debata do ngolu ni angka na olo manjanghon Ibana jala na manontong manghirim di Tuhan i.

2.     Puji Tuhan, Jesus Kristus ima Mesias, sian marga ni si Daud jala gabe Sintua ni Malim na badia jala na songkal situtu, lobi sian habalgaon ni hamalimon ni si Harun na laho manguluhon sada bangso na imbaru, lobi sian bangso Isarel sandiri. Marhite Ibana, nunga dipauli jala dipajongjong Debata muse bangsoNa. Hita na porsea tu Tuhan  Jesus ima gabe bangsoNa ala ni asi ni roha (anugerah). Siala ni i rap ma hita mambahen sada komitmen dohot  hasetiaon ndang be mangulahon dosa na parjolo i.

Nunga be tabereng rumang ni parugamoon di bangso Indonesia. Jala nunga taboto be manang songon dia rumang ni angka pangalaho ni angka uluan ni bangso i sandiri. Siala ni ido, marhite Natal di taon 2015 on, saluhut halak Kristen ingkon manangiangkon asa bangso on sonang dibagasan par-Tuhan-on na be. Ai ndang holan hamaloon sambing na ringkot na gabe uluan ni bangso on, alai ingkon roha na mar-Tuhan do jala pamarentaon ni Debata adong dibagasan ulaon nasida. Hita ndang na laho mang-Kristen-on saluhut bangso Indonesia, alai dao andul sian i, ingkon pabotohononta barita  ni Tuhan Jesus, asa gabe Ibana Raja jala Sintua ni Malim dibagasan roha ni sandok jolma on. Amen

Bahan Jamita UJUNG TAON PARHURIAON, Minggu 22 Nopember 2015, Lukas 12 : 35 - 43

Ev. Lukas 12 : 35 - 43

RADE MA HITA  DI GANUP TINGKI

I.    Pamuhai

Molo tinaringotan taringot tu hamatean, adong dua gombaran na boi antusanta. Hamatean ni daging (jasmani), ima uhum ni Debata ala dosa, jala gombaran ni hamatean ni tondi (rohani). Parjolo sahali, di portibi on masa ma hamatean ni partondion. Dungi adong panirangion dohot uhum secara rohani dung hamatean ni pamatang/daging (jasmani). Alai dung adong haheheon ni naung monding, gabe adong ma hamatean na paduhalihon na dibagasanna uhum maradophon sibolis dohot angka pardosa (parjahat) digoarmai UHUM na MANONTONG (hukuman kekal), Psalm 56:14; Poda 2:18; 5:5; 14:12; Joh. 5:24; 8:51; Rom 6:23; 8:2, 6; Jak. 1:15; 5:20; Pang. 20:6. Disada sisi na asing, hamatean i ima sada peristiwa naung tarjalo (peristiwa lumrah); jolma i ditotophon sahali mate (Heber 9:27) dung ipe asa diuhum. Jala na rap ma do hita rap dohot Ibana (Joh. 11:16). Alai disada sisi muse, hamatean i sada peristiwa na so tarjalo (tidak wajar). Hamatean i upa ni dosa doi (Rom 6:23), siala ni i ma tama doi gabe sihabiaran. Secara biologis, ingkon masa do hamatean, alai hamatean ni sasahalak jolma dang dos dohot parmate ni pahanpahanan.  Alai on ma taingot: hamatean i ala ni dosa (1 Musa 2:17; Rom 5:12).  Jadi, hamatean (maut) ala ni dosa i, andul doi jumorbut sian hamatean ni daging (pamatang). Jolma i ndang tarjorat dibagasan jaring nasib (takdir), manang ala ni garis ni tangan (suratan tangan), siala ni molo mardosa sahali sahalak jolma, ndang adong be na boi siulahononna taringot tu si. Ala Debata do di atas ni saluhutna, molo dilehon Ibana uhum hamatean ala dosa, dilehon do nang tongtong upa ngolu salelengna tu angka pardosa. Hamonangan ni Jesus maradophon hamatean na salelenglelengna i (1 Kor. 15:26, 54) ido hasisingkopna jala sempurna. Laos hamonangan i diparade tu bangsoNa. Partalu ni hamatean pasti doi. Ndang adong be huaso ni hamatean na paduhalihon tu angka halak na porsea (Pang. 2:11; 20:6). Jadi, siala ingkon masa do hape hamatean tu ganup jolma, jala ndang tarboto manang sadihari hamamasana, marhite jamita on diparade roha ni ganup jolma, asa unang dihabiari hamatea, ala mangarade ma marhite panghobasion na tama maradophon Debata!

Hatorangan – Aplikasi

Ayat 35: Diparentahon Jesus i do asa mangarade angka jolmai jala dungo manomunomu haroroNa, asa disasude jolma naung manimpanton artana dibanuaginjang, asa bongot nasida tu si jala laos nasida ma mandai i saluhutna. Sian na jolo nunga diparade Tuhan Jesus roha ni sandok jolma i, nang ditingki ni ngoluNa nang dung manaek Ibana tu banua ginjang. Jala sai dipangke Tuhan Jesus do songon dia jolma i na sai manjagahon dirina, nang songon dia angka na pinangke ni jolma i di ganup angka ulaonna siganup ari. Suang songoni do nang na paradehon diri di haroro ni Tuhan i, sian angka na adong di jolma i do dibahen asa hatop mangantusi dipandohan ni Jesus, asa unang marsalaan angka pangantusion taringot aha do siulahonon ni jolma i saleleng dingoluna, (Epesus 6:13 – 14:” Dibahen i, jalo hamu ma pangkean sinjata na sian Debata, asa tarbahen hamu mangalo di ari na jahat i, jala hot jongjong, dung dipatunduk hamu sasude. Antong, jongjong ma hamu, marhohoshon hasintongan di gontingmuna, angka naung manolukkon bajubaju partahanan, i ma hatigoran i.) [Epesus 6:15 – 17:” Marsipatu ma patmuna, laho mangkaringgashon barita na uli, pardamean i. Angkup ni sudena i, jalo hamu ma lombulombu haporseaon i; haintopan hamu do marhite sian i sude sumbia api ni parjahat i. Jangkon hamu ma nang tahuluk haluaon dohot podang ni tondi, i ma hata ni Debata]. Palito na galak: Ima sondang hatiuron na manondangi sandok parngoluanna. Ai disi ma patar idaonna hasangapon na habadiaon ni Debata {Pangungkapon 1:13 Jadi di tongatonga ni angka parpalitoan i huida ma na suman tu Anak ni jolma, na marsampesampe jala marhohos sere di pamatangna}. Laos palito ido mata di na holom. Laos dihatiuron ni parnidaan, disi ma nang tiur sandok daging ni hajolmaon i; alai molo ndang galak parpalitoan i, daging i pe gabe holom, ai ndang marnida nang simalolong, gabe roa ma nang daging i! {Lukas  11:34 Palito ni daging do mata i. Molo hisar matam, tiur ma sandok dagingmu; alai molo roa, mangkolom ma nang dagingmi}. Ayat 36 – 38: Haredeon na dison ima na so ditondtuhon tingkina, jala ndang dipabotohon tingki sadihari haroroNa i. Songon ia parujung ni pesta parunjuhan i, songon i ma na hamulmulakna. Ala ndang diboto manang tingki sadihari harorona i, panjagaon ingkon manontong jala dungo. Ai manang sadihari dituktuk tuan i, ingkon disima ungkap na pintu i, unang sanga salpu! {Pangungkapo  16:15 Ida ma, na ro ma Ahu songon panangko! Martua ma na dungo jala na mangaramoti abitna, asa hobas, asa unang marsaemara ibana mardalan, gabe tarida hailaonna!; Lukas  21:36 – 37a:”Alai dungo ma hamu tongtong mardongan tangiang, asa margogo hamu, pasiding saluhut na naeng masa i, laho jongjong di jolo ni Anak ni jolma i.;  Martua ma angka anak somang i, na dungo dapoton ni indukna di harorona i}. Ayat 39 – 40: Boasa pola ingkon dungo anak somang i paimahon haroro ni induk i? Ala ndang diboto harorona. Molo diboto, ditingki i ima ibana dungo, ditingki na so nitontuhonna gabe ndang dungo! Tudos do i pangaradeaon di angka na ro laho mangaloha bagas ni sasahalak jolma. Alai ala Tuhan i do na manontuhon tingkina, jala guru di Ibana do saluhut angka partingkian na adong di tano on. Molo dung taboto sadihari ro Ibana, ndang adong tubu panghirimon, jala asa so adong be panghirimon, ndang hot be haporseaon. Saluhut na gabe siboan lomona, holan ditingkinai ma ibana mangarade, hape na pinagido ni Tuhan, naeng uli, denggan marhaporseaon huhut mangolu dibagasan panghirimon na manontong. Ai nang disi do tarida hinauli ni na mar-TUHAN-i, jala disi do sintong panghilalahon boha do ringkot ni na ingkon mar-TUHAN-i. Antong, nunga ganjang jala nunga godang ari-ari na pinasahat ni Debata, sahat ro di tingki on. Umbahen ido gabe boi hita nuaeng sahat diujung taon parhuriaon on. Sian haganjangon nang sian na godang i, dipaingot hita nuaeng, angka dia naung tabolos i na mambahen las roha ni Tuhan i, nang jut ni roha ni Tuhan i. Molo tapanghilalahon do angka hahuranganta dibagasan taon on, ima sipune on ta di taon na pina rade ni Debata di hita, ima taon 2016! Porsea ma hita, na sai donganan do hita rasirasa ro ajal ni hasiangan on!

Siulahononta:

1.     Marroha na patut ma hita sahat ro di ajal ta, ido haradeon ni roha mangungkap pintu di Ibana

2.     Angka parhobas, hohos gonting=mangarade manang na tudia pe disuruhon Tuhan i jala rade mangulahon saluhut na tinonahonNa, ima marhite na manondangi (pagalak palito), asa uju bongot Raja i tius ma sude di dapot. Marlas ni roha ma Ibana marnida haradeonta, ai patimboonna do nang hita lobi sian halak na asing i (on ma panjanghononna di hita, ai Ibana pe nga rade manghobasi di hita)

3.     Ala ndang taboto haroroNa, ganup tingki ingkon dungo jala unang tarlalap. Ingkon porsea jala pos do roha na tutu situtu ro Ibana, alai diangka na so porsea ro Ibana, ido halak na dumangol.

4.     HaroroNa  nunga be jonok, siala ni Kristus i ma na tapaima, unang sai tarlalap rohanta holan marnida na masa diangka tanda-tanda i, manang sai holan na manungkuni sadihari haroroNa. AMEN!

Bahan Jamita Minggu. 15 Nopember 2015; Daniel 12 : 1 - 13

Ev. Daniel 12 : 1 - 13 

Mar-PATTAS ni ROHA ma hamu sahat ro di ajal ni tano on

 

Patujolo – Hatorangan

Nunga diuarihon si Daniel, sada partingkian na gok hasosahan (masa sulit) tu Israel, ai ditingki i ingkon saut ma songon na sinuriranghon  ni angka panurirang (Jer 30:7; patudos: Mat 24:15,21; Pangungkapon 6:17), alai adong dope sangkap ni Debata paluahon bangso i, ima angka bangso na adong tarsurat goarna di bukku pustaha hangoluan (Pilippi 4:3; Pang. 3:5; 21:27). Partingkian i ingkon masa on pangarupaon jala gok parmaraan, jala na so hea dope masa sisongon i. Nang naung godang dipardalanan ni Israel angka na masa, alai dao andul dope sian i saluhutna. On ma na ginoaranna “ari hagogotan ni Jakkob: (Jer. 30:7)”. Siala ni ido ro surusuruan Mikhael jongjong mandongani bangso ni Debata.  Jala diujungna ingkon haporseaon ni nasida do Jesus songon Mesias Ibana, Sipalua, jala Tuhan ni nasida.   

Ay. 1:  On ma pangajarion ni Padan Na Robi na tumangkas na pabotohon taringot tu haheheon ni halak na sintong dohot angka parjahat (Job 19:25-26; Psalm 16:10; Jes 26:19). Taida do manang na sognon dia pangaramotion ni Debata laho manjalo haluaon i jolma i ditingki ari parpudi i (1 Petrus 1:5). On ma barita ajal ni tano on (akhir jaman), barita haluaon ni angka na tarsurat di pustaha hangoluan. Halak na tarpillit ido na tarsurat dipustaha hangoluan i. Ndang adong haluaon punguan (kolektif), alai marsadasada do (pribadi). Jesus pabotohon adong dua horong ni haheheon ni jolma (Joh 5:28-29). Bukku on ima manaringoti taringot tu Huaso ni Debata manang Bukku hangoluan. (Bnd. 2 Musa 32:32; Psalm 69:29; 139:16; Jes 4:3; Luk 10:20; Pang. 20:12; Patudos: Dan 7:10).

    

Ay. 2: Hata “tarsunggul sogot”, boi tapamanat nang di Joh. 11:24; biasbias di Jes 26:19. Hata tarsunggu sogot sada sian ayat na rumingkot di Padan Na robi  na pabotohon pangajarion taringot tu hahaheon ni daging on sogot. (Hes. 37:10). Na modom di orbuk ni tano, on ma pangajarion taringot tu sada inganan di ari parpudi (alam baka) na nidok goarna: PRATALA, ima: inganan ni angka naung monding na so adong jumpang disi parimbaron, nang na burju roha nang parjahat. Alai dung hehe nasida, tarida ma nang hasasautna, na deba tu hangoluan salelenglelengna, na deba tu haurahon marragamragam, gabe biasbias salelenglelengna.

Ay. 3: “halak angka na pantas marroha, marsinondang sogot”. Halak na pantas marroha (orang bijaksana), songon na pinatorang ni Padan Na Robi, ima angka halak na badia (orang saleh). Dipatuduhon nasida do harohaon na  denggan, marhite sian parange ni ngolu dohot angka panghatindangion ni nasida, huhut na tau nasida olo manogunogu halak na asing tu hangoluan na denggan ima HATIGORAN i. Sondang ni nasida marlapatan doi naeng paubaon jala paimbaruon do nasida, jala hamuliaon ni Jahowa ingkon marsinondang sian nasida jala marhite sian nasida. Halak na pantas marroha (orang-orang bijaksana) {Dan 11:33} ingkon marsonondang, Mat. 13:43; Joh 5:35; Pilipi 2:15, tu hasintongan {Jes. 6:7} salelenglelengna (Poda 4:18). 1Kor 15:42, naung godang maogu-nogu halak tu hasintongan, lapatanna: diajari nasida do torop jolma manang na boha do ngolu na sintong di adopan ni Debata. Ndang asa dapot pujian nasida manang gabe siingoton ni torop halak (bnd. Jes 1:31), alai nasida naeng paubaon nang taringot tu pamatang ni nasida sandiri, pamatang na marhasangapon (mulia).

Ay. 4 – 13: Manahapi Pustaha. Disuruhon si Daniel laho manahapi pustaha i; Pandohan on ndang holan masa manang marlakku i dipartingkian i/partingkian ni si Daniel sambing, alai sahat doi ro di ajal ni tano on, laho manggogoihon halak na mangolu di hatiha i. Disi do di ida si Daniel dua surusuruan di bariba ni batang aek, ihut manungkun manang sadia leleng nari asa sahat ajal ni tano on (Dan 12:9-13; Pang. 22:10; akhir jaman). Halak na marpahean hori (kain lenan; bnd. Dan:5-6) na marmangmang (Jes. 8:16 ; bersumpah) ibana ingkon jolo salpu sada tingki, dua tingki dohot satonga tingki naung binuhul hian, jala dung pe sohot parserahan ni pasipasi sian bangso na badia i, ipe asa marujung saluhutna i. Di ay. 10: Dipabotohon tu si Daniel, sude nubuatan on masa ma on ditingkina ima di ari parpudi (akhir jaman). Ditingki i ma, marpigapiga sian jolma i ingkon paiasonna (dimurnikan) marhite sian godang ujian; nasida on ma na ginoaranna halak na pantas marroha jala na mangantusi saluhut na masa i. Ai ndang adong jumpang di nasida halak parjahat (fasik) manang pangalo di sangkap ni Debata (pemberontak). Ihut tusi ma, ingkon masa ma partingkian na hancit na pasaehon saluhutna i (Bnd. Mat. 24:15). Di ragam ni na masa i, torop do halak na so boi mangantusi i, alai halak na pantas marroha (orang bijaksana) ingkon antusan ni nasida doi, na mambahen nasida ingkon gabe porsea tu Jesus dohot harajaonNa, sahat ro di ujungna. Alai boi do on dohonon partingkian on ima pangajarion masa andorang ari parpudi i na mandok: tingki pangunjunan (ujian) jala mamparbadiahon halak na burju roha; jala halak na jahat roha torus marjahat roha sai songon na so parduli nasida, alai halak na marroha mangantusi saluhutna i, mangantusi taringot tu nubuat ari parpudi (Orang arif (ialah orang2 baik) pada ketika itu akan memahami nubuat tentang akhir jaman itu).   

Sipahusorhusoron

1.        Partingkian na naeng ro, ndang saluhutna i partingkian na mambahen las roha songon na pinarsitta ni torop halak, alai ditingki i ingkon adong do hasosahan ni torop halak, nang hit ape halak Kristen, boha do rohanta nang panghaporseaonta laho mangadopi i? Adong do jumpang biar ni roha, humolso na gabe mambahen hita ndang be marpanghirimon tu Tuhan i? Dang diloas Tuhan i halak na porsea mangadopi angka partingkian na borat jala na sosak i sahalaksa. Adong do jaminan na pinasahat ni Tuhan i, ima pangaramotionNa asa margogo nasida jala tau mangadopi saluhutna i jala ingkon hot dipanghirimonna dohot tang ni haporseaonna.

2.        Sangkap ni Debata ndang hea sundat manang sala. Sidia godang pe muse ni Debata na naeng mangambati sangkap ni Debata taringot tu haluaon ni saluhut jolma na porsea, ndang tau i.

3.        Jotjot do hita sai songon na so tarjalo hita pambahenan ni Debata, marnida na masa di portibi on, uju taida angka parjahat manang pardosa i gabe marlomolomo jala sai songon na so mardosa nasida, nasida na sumonang idaon. Alai sasintongna, unang holan tu na tapar i taida pambahenan ni Tuhan i, na boi mambahen hita gabe mangiburu tu angka parjahat jala pagalehon haporseaonta. Tahaporseai ma, mangula dibagasan hatigoran do Tuhan i, jala hombar tu naung sinagkapanNa, asa margogo jala marroha na pantas hita marnida saluhut na masa di tano on.

4.        Hasetiaon dohot haringgason ima sada pangalaho ni halak Kristen naung manghilalahon basabasa ni Debata (anugerah) jala na sai tongtong magodang jala martumbur dibagasan Hata ni Debata (hidup bertumbuh dalam firman-Nya)

5.        Tangiangta: Tuhan…parade ma saluhut jolma mangadopi ragam ni angka hamaolon na naeng masa na naeng ro on, gok parungkilon nang pangambati marhite HataM na mangalehon gogo, asa adong hasetiaon di bangsoM huhut marharinggason, manahan sahat ro di ari haroroM tu tano on.